«Այս ծրագիրը հիմնականում պետք է ապահովի սոցիալական այն խնդիրները, որոնք Հանրապետական կուսակցությունն իր առջեւ դրել է նախընտրական ծրագրի շրջանակներում»,- նոյեմբերի 4-ին «Հենարան» մամուլի ակումբում լրագրողների հետ հանդիպման ընթացքում, անդրադառնալով կառավարության ծրագրին, ասաց ԱԺ ՀՀԿ խմբակցության քարտուղար Գագիկ Մելիքյանը:
Նա նշեց, որ քաղաքական, ինչպես նաեւ տնտեսության բնագավառում իրականացվող փոփոխությունները պահանջում են նաեւ ավելի կոշտ քաղաքական մոտեցումներ, որոնք իր առջեւ դրել է նաեւ նոր կառավարությունը՝ Կարեն Կարապետյանի գլխավորությամբ. «Ծրագիրը, որ քննարկվեց Ազգային ժողովում եւ մեծ հավանության արժանացավ, պետք է նշեմ, որ հետեւանք է այն բյուջեի, որը պետք է իրականացվի: Բյուջետային եկամուտների եւ ծախսերի մասում նախատեսվում է բավականին փոփոխություններ դրական առումով եւ այդ փոփոխությունները պետք է իրականացվեն եկամտային մասի ապահովման եւ կոշտ տնտեսական քաղաքականություն իրականացնելու ձեւաչափով: Պայքար ստվերի դեմ, պայքար կոռուպցիայի դեմ, տնտեսական հարկային մեղմ քաղաքականություն, որի հետեւանքը կարող է լինել նաեւ ներդրումների ավելացումը, ինչպես նաեւ տնտեսական արդյունավետության բարձրացումը՝ ապահովելով նաեւ համապատասխան տնտեսական աճ սոցիալական խնդիրները լուծելու նպատակով»:
Գագիկ Մելիքյանն ընդգծեց, որ շատ է կարեւորում նախագահի ելույթի հետեւությունները, որոնք արդեն տեսանելի են. «Նախագահն արդեն հստակ ձեւով վեր է բարձրացնում այնպիսի խնդիրներ, որոնք հասարակության մեջ բազմիցս քննարկման եւ շահարկման առիթ են դարձել: Խոսքը կարմիր գծերի, արագաչափերի, տեսանկարահանող սարքերի մասին է: Եվ երեկ արդեն կառավարության նիստում վարչապետ Կարապետյանի կողմից տեսանք ավելի հստակ հանձնարարականներով, ժամկետներով: Կարծում եմ՝ դա ոչ միայն կնպաստի վստահության աճի բարձրացմանը, այլ նաեւ պետական բյուջեի եկամտային մասի ապահովմանը: Մասնավոր-պետական համագործակցությունը պետական հսկողության ավելի հստակ ձեւաչափով, կարծում եմ, որ կտա իր դրական արդյունքները: Ես համոզված եմ, որ առաջիկայում այդ դրական արդյունքներին ականատես կլինի նաեւ հասարակությունը»:
Կարդացեք նաև
Ամի ՉԻՉԱԿՅԱՆ
