Թուրքիայի իշխանությունները թույլ չեն տալիս Գերմանիային շինարարական նախագծեր իրականացնել այդ երկրում տեղակայված ՆԱՏՕ-ի «Ինջիրլիք» ռազմաբազայում: Այս մասին գրում է գերմանական Die Welt պարբերականը:
Գերմանիան պատրասվում է շուրջ 58 մլն եվրոյի ներդրում կատարել ավիաբազայում: Այդ գումարով նախատեսվում է նոր օդանավակայան կառուցել գերմանական բազմաթիրախ Tornado կործանիչների համար, հիմնել ժամանակակից հրամանատարական կետ և այլն:
Գերմանիայի կանաչների կուսակցության՝ անվտանգության հարցերով ներկայացուցիչ Ագնեշկա Բրուգերի՝ Գերմանիայի կառավարությանն ուղարկված հարցման պատասխանից երևում է, որ այսպես կոչված «ենթակառուցվածքային արձանագրությունը» մինչ այժմ չի ստորագրվել, քանի որ «թուրքական կողմը ներքին գործընթացներ է անցկացնում՝ վերջնական հաստատման համար»:
Ռազմաբազայի զարգացմանն ուղղված աշխատանքները պետք է սկսվեին ընթացիկ տարվա հունիսին, սակայն ձգձգվում են՝ հունիսի 2-ին Բունդեսթագում Հայոց Ցեղասպանությունը դատապարտող բանաձևի ընդունման պատճառով: Դրանից հետո Անկարան երկար ժամանակ չէր թույլատրում գերմանացի խորհրդարանականներին մուտք գործել ռազմաբազա, ի պատասխան՝ Գերմանիան սպառնում էր հետ կանչել իր զինվորականներին:
Կարդացեք նաև
Այս պահին «Ինջիրլիքում» ծառայում է ավելի քան 240 զինծառայող Գերմանիայից:
Պատրաստեց՝ Վիկտորյա ԱՆԴՐԵԱՍՅԱՆԸ
