Մեդիա նախաձեռնությունների կենտրոնում նոյեմբերի 3-ին «Լրադադար» ակումբի հերթական հանդիպումն էր «Հարձակումներն ու բռնությունները լրագրողների նկատմամբ. 2015-2016» թեմայով: Քննարկմանը ներկա էին մի շարք մեդիա փորձագետներ եւ լրագրողներ:
Հանդիպման ընթացքում Խոսքի ազատության պաշտպանության կոմիտեի ղեկավար Աշոտ Մելիքյանը նշեց, որ 2016 թվականի իրադարձությունները 2015 թվականի անպատժելիության հետեւանքներն են. «Ոստիկանությունը զգալով, որ ոչ ոք իրենց պատասխանատվության չի ենթարկելու ավելի լկտիացնում է իր քայլերը: Եվ հատուկ միջոցներ կիրառելն ուղղակի աբսուրդի թատրոնի է վերածվում: Ոստիկանները լրագրողներին ընկալում են որպես հակառակ կողմ, ճնշելու օբյեկտ»:
Աշոտ Մելիքյանը հավելեց, որ փորձել են համեմատել, թե լրագրողների նկատմամբ տեղի ունեցած բռնության առումով որքան են 2015 եւ 2016 թվականը իրարից տարբեր՝ 9 ամիսների տվյալներով. «2015 թվականի 9 ամիսների ընթացքում արձանագրված էր բռնությունների 5 դեպք, որի ընթացքում 20 լրագրող եւ օպերատոր էր տուժել, 2016 թվականի 9 ամիսների ընթացքում 8 դեպք, որի ընթացքում 24 լրագրող եւ օպերատոր է տուժել: Ճնշումների առումով՝ 2015 թվականին 43 դեպք է արձանագրվել, այս տարվա 9 ամիսների ընթացքում՝ 46 դեպք: Տեղեկություններ ստանալու եւ տարածելու իրավունքի խախտում՝ 2015 թվականին 22 դեպք, 2016 թվականին՝ 24-ը: Այսինքն՝ մեր դասակարգմամբ, որ նայում ենք, բոլոր 3 կատեգորիաններում աճ է արձանագրվել»:
Ամի ՉԻՉԱԿՅԱՆ
