Այսօր Արարատի մարզի Քաղցրաշեն գյուղի բնակիչները կրկին հավաքվել էին կառավարության շենքի առաջ: Նրանք պահանջում էին խաղողի գումարները, որն անցյալ տարի մթերվել է «Վինար» ընկերության կողմից, սակայն մինչ օրս գումարները չեն ստացել:
Քաղցրաշենցիների խոսքերով, ամբողջ գյուղը վարկերի տակ է եւ եթե գումարները մոտ օրերս չստանան, ապա բանկերը մարդկանց գույքն են վերցնելու:
Նրանք նաեւ ասացին, որ «Վինար»-ի սեփականատեր Ավետիք Գալստյանը խաբել է եւ իր նշած ժամկետում գյուղացիների գումարները չի տվել: Հիշեցնենք, որ հոկտեմբերի 13-ին գյուղնախարարը քաղցրաշենցիների հետ միասին հանդիպեցին «Վինար» ընկերության սեփականատիրոջը, որը խոստացել էր իր ունեցած սպիրտը վաճառել ու գյուղացիների պարտքերը մարել: Այսօր սակայն, քաղցրաշենցիներին հանդիպած գյուղնախարարը, ըստ խաղողագործների, ասել է, որ պետք է պատասխանատվության ենթարկել մթերող ընկերության ղեկավարին, որը գյուղացիների ներկայացմամբ, որեւէ գույք չունի, որ իրենց պարտքերը փակի:
Քաղցրաշենցիների խոսքերով, նոյեմբերի 7-ին վարկերի մարման օրն է, սակայն գումար չունեն որ մուծեն: Նրանք պահանջում էին հանդիպում վարչապետի հետ:
Կարդացեք նաև
«Գործարանի սեփականատերը թալանչի ա, մի հատ հավ գողացողին են բռնում դատում, բա էս մարդը 1000 ընտանիքի վիզ ա կոտրել, ո՞վ պիտի պատասխան տա: Գյուղացին ո՞վ ա, որ հիմա գա կանգնի ստեղ, գյուղացին հիմա պետք ա էթա իրա այգին թաղի, հող մշակի»,-վրդովված ասում էին խաղողագործները:
Լուսինե ԲՈՒԴԱՂՅԱՆ
