Ինչպես ավելի վաղ հայտնել էինք, «օֆշորի գործով» տուժած գործարար Փայլակ Հայրապետյանը մեզ հետ զրույցում ասել էր, որ դիմել է ՀՀ վարչապետ Կարեն Կարապետյանին՝ Հայաստանում թեթեւ արդյունաբերությունը զարգացնելու ծրագիր ներկայացնելով: Այսօր «օֆշորի գործով» հերթական նիստի ավարտին նա Aravot.am-ին հայտնեց, որ վարչապետը վերջերս կայացած հանդիպման ժամանակ ընդունել է իր առաջարկը:
«Առաջարկը շատ լավ ընդունել է, նա հանձնարարություն է տվել էկոնոմիկայի նախարարին, հիմա էլ նոր նամակ ենք գրել նրան՝ խնդրելով մարզպետարաններին հանձնարարել մեզ տրամադրել 5000 հեկտար չօգտագործվող վարելահող, որ կարողանանք հումք ստեղծել՝ բամբակ ցանել»,-մեզ հետ զրույցում ասաց Փայլակ Հայրապետյանը՝ ակնարկելով, որ ժամանակին Հայաստանի բամբակն աշխարհում լավագույններից է համարվել:
Ըստ Փայլակ Հայրապետյանի՝ իր ծրագրով Հայաստանում նախատեսվում է մոտ 10 գործարան հիմնել եւ 15 000 աշխատատեղ բացել: Մեր զրուցակիցը հավելեց, որ վարչապետին նաեւ խնդրել են միջնորդել՝ հատկացնել կարճաժամկետ վարկեր՝ նշյալ ծրագիրը կյանքի կոչելու համար:
Կարդացեք նաև
Լուիզա ՍՈՒՔԻԱՍՅԱՆ
