Նոյեմբերի 3-ին Կենտրոն և Նորք-Մարաշ վարչական շրջանների ընդհանուր իրավասության դատարանում հետաձգվեց «Հայ կանանց ճակատի» անդամ Սուսաննա Սիմոնյանի՝ քրեական գործ հարուցելը մերժելու մասին որոշման բողոքարկման բաց թողնված դատավարական ժամկետը վերականգնելու մասին բողոքը, քանի որ գործով առկա լրացուցիչ փաստաթղթեր պետք է ներկայացվեն դատարանին:
Հիշեցնենք, որ հունիսի 22-ին Սուսաննա Սիմոնյանը Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի շենքի դիմաց՝ Ժիրայր Սեֆիլյանի նկատմամբ կալանքը որպես խափանման միջոց ընտրելու վերաբերյալ նախաքննական մարմնի միջնորդության քննարկման ժամանակ տեղի ունեցած ցույցի ընթացքում ոստիկանների կողմից ֆիզիկական ուժի գործադրմամբ բերման էր ենթարկվել, որի հետեւանքով ստացել էր մարմնական վնասվածքներ:
«Ինձ մոտեցավ ոստիկանական ենիչերական խումբը՝ կարմիր բերետավորներն ու սպիտակ համազգեստով ոստիկաններ: Վայրագ ձեւով, աջ թեւս դուրս գցելով եւ ինձ անասելի ցավ պատճառելով քաշեցին-տարան դեպի ոստիկանական մեքենա: Այդ ոստիկանը պետք է պատժվի: Նա միտումնավոր կերպով… ես կրել եմ ֆիզիկական, նյութական եւ բարոյական վնաս»,-նիստի ավարտին Aravot.am-ի հարցին ի պատասխան, թե ի՞նչ էր կատարվել դեպքի օրը, ասաց Սուսաննա Սիմոնյանը:
Կարդացեք նաև
Մեր նկատառմանը՝ «ասացիք, որ ոստիկանը միտումնավոր էր գործում, ո՞րն էր պատճառը», Սուսաննա Սիմոնյանն այսպես արձագանքեց. «Իհարկե, պատճառ կա՝ այս ռեժիմը ցանկանում է իր բռնի մեթոդներով վախեցնել պայքարի դաշտում գտնվող քաղաքացիներին: Դա պատժիչ-ահաբեկիչ գործողություն էր»:
Հիշեցրեցինք, որ նա թքել էր ոստիկանների ուղղությամբ. «Իհարկե, բա ինչպե՞ս պաշտպանվեի: Քաղաքացին ինչպե՞ս պետք է պաշտպանվի, երբ իրեն ցավեցնում են: Եթե ձեռքս, ասենք, մուրճ լիներ, կտայի գլխին: Բայց չեմ տվել, որովհետեւ ձեռքս նույնիսկ պայուսակ չկար»:
Նշենք, որ Հատուկ քննչական ծառայությունը որոշում էր կայացրել քրեական գործ հարուցելը մերժելու մասին, իսկ Սուսաննա Սիմոնյանն առողջական խնդիրների պատճառով բաց էր թողել որոշումը բողոքարկելու ժամկետները: Քննիչը դատավարական ժամկետների բացթողումը հարգելի չի համարել: Սիմոնյանը դատարանից պահանջում է վերականգնել բողոքարկման բաց թողնված դատավարական ժամկետը:
Այս գործով հաջորդ նիստը նշանակվեց նոյեմբերի 7-ին՝ ժամը 09:30-ին:
Լուիզա ՍՈՒՔԻԱՍՅԱՆ
Շատ լավ է արել, եթե բռնություն են կիրառում ռեժիմի որոշմամբ ինչպես պաշտպանվեր․․ Անմարդկայիններ, ուժները ոնց ասես գործում են աջ ու ձախ, Կեղծիքներով շինծուների խումբ, բավական է խեղկատակություն անեք, ծիծաղելի մի եղեք։
Մի պահ մտածում ես, թե ուր են հասել, որքան է փոխվել ՀՔԾ-ի և դատավորների աշխատելաձևը, ինչքան է տարածված նրանց մեջ կեղծիքն ու անմարդկային քայլերը։ Ովքեր նրանց փողեց դեպի վատը, ռեժիմը, և ռեժիմը սերմանեց նրանց մեջ բացասական կողմեր ի վնաս հայ ժողովրդի․․ ովքեր փորձում են ամեն ինչ անեն, միայն թե վնաս պատճառեն մարդկությանը իրենց շինծու որոշումներով, իմացեք դուք ձեր օրվա լույսը չեք տեսնի, ու ձեր լացն եք լացելու․․․ ԱՄԵՆ․