Ռուսական «Պոբեդա» բյուջետային ավիաընկերությունը պատրաստվում է հրաժարվել դեպի Երևան չվերթներից: Այս մասին գրում է ՏԱՍՍ-ը՝ վկայակոչելով ընկերությունում իր աղբյուրը:
Ըստ այդ տեղեկատվության՝ պատճառը Երևանի օդանավակայանում ուղևորների համար ծառայությունների բարձր սակագներն են:
«Մենք որոշել ենք հրաժարվել դեպի Երևան թռիչքներից՝ օդանավակայանում ուղևորների սպասարկման անընդունելի բարձր գների պատճառով: «Զվարթնոցում» այն կազմում է մեկ անձի համար 50 եվրո, ինչն ավելին է, քան մեր սակագինը»,- ասել է գործակալության զրուցակիցը:
Աղբյուրը նշել է, որ «Պոբեդայի» արտասահմանյան ցանցում օդանավակայաններում ուղևորների սպասարկման միջին սակագինը կազմում է մեկ անձի համար 10 եվրո, իսկ որոշ օդանավակայաններում անգամ անվճար է:
Կարդացեք նաև
Հիշեցնենք, դեռ 2016թ. հուլիսին տեղեկություն տարածվեց, որ «Պոբեդան» պատրասվում է չվերթներ իրականացնել Դոնի Ռոստով-Երևան ուղղությամբ, նախատեսվում էր, որ շաբաթական կիրականացվի 4 չվերթ:
Թե ինչ ճակատագիր է սպասվում նույն ավիաընկերության կողմից իրականացվելիք Մոսկվա-Գյումրի չվերթին՝ գործակալության հրապարակման մեջ չի նշվում:
Նշենք, որ «Պոբեդան» բյուջետային ավիաընկերություն է: Նման ընկերությունները, որպես կանոն, չվերթներ են իրականացնում դեպի ոչ բարձրակարգ, փոքր օդանավակայաններ:
Պատրաստեց՝ Վիկտորյա ԱՆԴՐԵԱՍՅԱՆԸ
