Այսօր ԱԺ մարդու իրավունքների եւ հանրային հարցերի, ինչպես նաեւ ֆինանսավարկային եւ բյուջետային հարցերի հանձնաժողովների համատեղ նիստում քննարկվեց Մարդու իրավունքներ պաշտպանի գրասենյակին 2017-ի բյուջեի նախագծով հատկացումներն ու ծախսերը:
Ալեքսանդր Արզումանյանն օմբուդսմենին հուլիսյան դեպքերից հարց ուղղեց. «Մենք բոլորս հուլիսին ականատես եղանք մի նոր երեւույթի, երբ բերման ենթարկել հասկացողության ներքո մարդանց պարզապես առեւանգում էին: Հարյուրներով մարդկանց փողոցից առեւանգում էին, տանում էին ոստիկանություն»: Պատգամավորը նաեւ հարցրեց մարդկանց զորամաս տանելու հետ կապված. «Դա չլսված եւ աննախադեպ երկու դեպքեր էին, ոստիկանությունից ձեզ բացատրություն տվե՞լ են, որեւէ գործ հարուցվե՞լ է, դա մոռացվել-գնացվե՞լ է, թե՞ շարունակվում է»:
Արման Թաթոյանը պատասխանեց, որ մի քանի հարյուր բողոքներ են ստացել. «Բերման ենթարկվածը ազատությունից զրկված է, այդտեղ դիրքորոշումս միանշանակ է: Կապված ազատությունից զրկվածների իրավունքների ապահովման հետ, հատկապես այն ստորաբաժանումների հետ, որտեղ տարվում էին: Այդ օրերին բերման ենթարկելու ինստիտուտը ցույց տվեց, որ դրա գործադրումն արդյունավետ չէ, որովհետեւ եթե վերլուծում ենք, ազատությունից զրկված սկզբնական փուլում իրավունքների խախտումները ավելի շատ էին, քան հետագայում: Ակնհայտ է, որ այստեղ մենք ունենք լուրջ բացթողում՝ այդ ինստիտուտի գործադրման մեխանիզմների հետ կապված»:
Ինչ վերաբերում է զորամաս բերման ենթարկելուն, օմբուդսմենն ասաց, որ արտահերթ հրապարակային զեկույց է պատրաստում, որը պատրաստ կլինի մոտ 1 ամսից: Օմբուդսմենը խոստացավ, որ այդ զեկույցում հուլիսյան դեպքերի հետ կապված շատ սկզբունքային հարցեր են լինելու: Այդտեղ հարց ենք բարձրացնում՝ այստեղ պետությունը կրկնակի բեռի տակ է ընկնում՝ ցույց տալու համար, թե արդյո՞ք կար այդ վայր բերման ենթարկելու դեպքում վարույթ իրականացնելու նպատակ, որովհետեւ բերման ենթարկելն ինքնանպատակ չի գործադրվում: Եթե ինքնանպատակ է, ապա գործ ունենք խախտման հետ»:
Կարդացեք նաև
Օմբուդսմենն ասաց, որ պարզաբանումներ են իրենք պահանջել ոստիկանությունից եւ ստացել են. «Կան կարգապահական պատասխանատվության ենթարկված ոստիկանության ծառայողներ, այդ թվում՝ մեր գրությունների հիման վրա, կան լիազորությունները կասեցված ծառայողներ»:
ՄԻԵԴ-ի վճիռների հետ կապված Ալեքսանդր Արզումանյանը հարցրեց այն դեպքից, երբ Վճռաբեկ դատարանի նախագահի անունը կոնկրետ մեջբերվում է վճռում եւ քննադատության ենթարկվում կողմնակալ գործողությունների համար: Նրա խոսքերով՝ «Սա աննախադեպ երեւույթ է, կարո՞ղ ենք ակնկալել ձեր կողմից ինչ-որ գնահատականներ, որ այն դատավորները, որոնք հերիք չի մեզ վրա լուրջ ֆինանսական հետեւանքներ են թողնում, պետությունը ստիպված է հարյուր հազարներ վճարել անօրինական վճիռների պատճառով, բայց նաեւ արդեն ծաղրուծանակ ենք դառնում մեր ամենակարեւոր դատարանի դատավորների վարքագծի առումով»:
Օմբուդսմենը համաձայնեց, որ մտահոգություններ կան որակակական, այսինքն՝ իրավունքների խախտման բնույթի կամ պաշտոնատար անձանց գործողությունների մասով:
Հռիփսիմե ՋԵԲԵՋՅԱՆ
