Օրերս ԱԺ-ում ՕԵԿ պատգամավոր Հովհաննես Մարգարյանը խոսել էր Գյումրիում ինչ-որ դավաճանների, Հուդաների մասին եւ հայտարարել էր, որ առաջիկայում ամեն ինչ ջրի երես դուրս կգա ու կբացահայտի այդ «հուդաներին»:
Aravot.am-ը Շիրակի մարզպետ Հովսեփ Սիմոնյանից հետաքրքրվեց՝ Դուք գիտե՞ք Ձեր մարզի «հուդաներին», ովքե՞ր են, ո՞ւմ նկատի ուներ պատգամավորը:
Մարզպետը պատասխանեց. «Հուդան մի հատ է եղել, էն էլ մեր մոտ չի եղել»: Մեր հարցին՝ հետնորդներ չկա՞ն՝ նա պատասխանեց. «Չեմ կարող ասել: Չգիտեմ, ինքս Հուդաների հարցերով չեմ զբաղվում»:
Մարզպետից հետաքրքրվեցինք՝ 2017-ի բյուջեն, եթե նկատի ունենանք, գյումրեցու կյանքի որակը լավանալո՞ւ է: Նա պատասխանեց. «Ընդհանուր, եթե հանրապետության զարգացումը այն, ինչ ներկայացվում է, հնարավոր լինի կազմակերպել, իհարկե, մի մասը մենք ենք, կունենանք նաեւ առաջընթաց: Հույս ունենք, որ ամեն ինչ նորմալ կլինի»:
Կարդացեք նաև
Մարզպետն ասաց, որ չի կարողանում հասկանալ, թե ինչու են Շիրակի մարզը, Գյումրին ընդդիմադիր համարում. «Մինչեւ հիմա չեմ կարողանում հասկանալ: Ընդդիմադիրը հարաբերական հասկացողություն է: Երեւի ինչ-որ մի տեղ կարողանում են ավելի ազատ արտահայտել իրենց կարծիքը: Չեմ կարծում, որ պետք է Շիրակի մարզը կամ Գյումրի քաղաքը համեմատել մյուս տարածքների հետ, որովհետեւ իրականում այն շրջանակը, որ կա քաղաքական ուժերի, ԶԼՄ-ների, շատ հետաքրքիր է, բոլորը ներկա են՝ հաշվի առնելով, որ երկրորդ քաղաքն է: Կարող է մի քիչ էլ էմոցիոնալ են ամեն ինչ ներկայացնում: Ցավն այն է, որ այդ նույն իրադարձությունները տեղի են ունենում տարբեր տեղերում, բայց լրատվամիջոցների բացակայության պատճառով դա հանրությանը չի ներկայացվում: Մեզ մոտ դրա պակասը չունենք, էլի: Լուսաբանվում է այն էլ ոնց»:
Հռիփսիմե ՋԵԲԵՋՅԱՆ
