«Լրագրողներ առանց սահմանների» հասարակական կազմակերպությունը հրապարակել է աշխարհում մամուլի թշնամի քաղաքական գործիչների և կազմակերպությունների ցուցակը, որում տեղ են գտել Ռուսաստանի, Ադրբեջանի, Թուրքիայի նախագահները:
Ցուցակում, ընդհանուր առմամբ, ներառված է 35 անուն՝ պետությունների և կառավարությունների ղեկավարներ, քաղաքական և հանցավոր խմբավորումներ ու շարժումներ: Բացի նշված գործիչներից՝ իրավապաշտպանները որպես մամուլի թշնամիներ առանձնացրել են Սիրիայի նախագահ Բաշար Ասադին, Ղազախստանի նախագահ Նուրսուլթան Նազարբաևին, Իրանի հոգևոր առաջնորդ Այաթոլլա Ալի Խամենեիին, «Իսլամական պետություն», «Թալիբան» շարժումները և այլ գործիչներ ու կազմակերպություններ:
Ռուսաստանի նախագահ Վլադիմիր Պուտինին վերաբերող հատվածում նշվում է, որ այժմ Ռուսաստանում խոսքի ազատության մակարդակը շատ ավելի ցածր է, քան երբևէ՝ ԽՍՀՄ անկումից հետո: Այսօր այդ երկրում ճաղերի ետևում է 4 լրագրող: Կազմակերպությունը Պուտինին բնութագրում է որպես «ազգայնական ավտորիտարիզմի» ջատագով, որի կառավարման սկզբում պետության հսկողության տակ հայտնվեցին երկրի բոլոր գլխավոր հեռուստաալիքները:
Բացի այդ, իրավապաշտպաններն ընդգծում են, որ Ռուսաստանում ընդունված է առանց դատարանի որոշման կայքերի փակումը, իսկ սոցցանցերի օգտատերերը կարող է մեկ գրառման պատճառով ճաղերի ետևում հայտնվել:
Կարդացեք նաև
Թուրքիայի նախագահ Ռեջեբ Թայիփ Էրդողանի վերաբերյալ հատվածում իրավապաշտպանները նշում են, որ նա ընդհանրապես չի սիրում մեդիան, ավելի ճիշտ, սիրում է, որ այն լինի հնազանդ և իրեն գովերգի: Կազմակերպությունը նշում է, որ 2016թ. հուլիսի ռազմական հեղաշրջման փորձից հետո սահմանված արտակարգ դրությունը Էրդողանին թույլ տվեց ձերբակալել աննախադեպ թվով լրագրողներ և փակել ավելի քան 100 թերթեր, ամսագրեր, հեռուստաալիքներ և ռադիոկայաններ: Մասնավորապես, այդ ժամանակից ի վեր փակվել է 124 լրատվական միավոր, ձերբակալվել է ավելի քան 200 լրագրող, տասնյակ լրագրողներ լքել են երկիրը:
Ինչ վերաբերում է Ադրբեջանի նախագահ Իլհամ Ալիևին, իրավապաշտպանները գրում են, որ 2014թ-ից նա դաժան պատերազմ է մղում իր քննադատների դեմ: Անկախ լրագրողները և բլոգերները բանտ են նետվում, որոշ անկախ լրատվամիջոցներ, ինչպիսիք են «Զերկալոն» և «Ազադլիքը» ճնշվում են ֆինանսապես, մյուսները («Ռադիո Ազադլիք») ուժով են փակվում: Առավել անհնազանդ լրագրողներին զսպելու համար իշխանությունները հաճախ ահաբեկում են նրանց ընտանիքների անդամներին:
Պատրաստեց՝ Վիկտորյա ԱՆԴՐԵԱՍՅԱՆԸ
