Երեկ հայտնի դարձավ, որ Արագածոտնի մարզի ընդհանուր իրավասության դատարանում երկամսյա կալանքի որոշում է կայացվել Օշական համայնքի բնակիչ 27-ամյա Ալբերտ Մելիքյանի նկատմամբ։ Վերջինս, պարզվում է, քրեական աշխարհում հայտնի Գեւորգ Մելիքյանի՝ Օշականցի Գեւորիկի եղբոր որդին է։
Դեռեւս այս տարվա օգոստոսի 4-ին արտակարգ դեպք էր տեղի ունեցել Արագածոտնի մարզում։ Սուր կտրող-ծակող առարկայից ստացած մարմնական վնասվածքներով Աշտարակի բժշկական կենտրոն էին տեղափոխվել 4 հոգի՝ Աշտարակի բնակիչներ 40-ամյա Վաչե Մովսիսյանը, 47-ամյա Գեւորգ Գարանյանը, 32-ամյա Ռաֆիկ Ջուլհակյանը եւ 37-ամյա Արման Միրզոյանը։
Եվ ըստ պաշտոնապես չհաստատված լուրերի՝ կատարվածում մեղադրվում է քրեական հեղինակություն Օշականցի Գեւորիկի եղբորորդին՝ Ալբերտ Մելիքյանը։
Shamshyan.com-ի փոխանցմամբ՝ հանցագործությունը կատարելուց հետո Ա. Մելիքյանը դեպքի վայրից փախուստի է դիմել BMW X5 մակնիշի 39 ԼՍ 999 համարանիշի ավտոմեքենայով։ Իսկ դեպքի վայրում հայտնաբերվել է Toyota Land Cruiser մակնիշի 31 VN 333 համարանիշի ավտոմեքենա, որի վրա եղել են արյան հետքեր։
Կարդացեք նաև
Հասկանալու համար՝ որտեղ է հետախուզման մեջ գտնվող մեղադրյալը, «Ժողովուրդ»-ը կապ հաստատեց նրա հոր՝ Սաշա Մելիքյանի հետ։ Վերջինս վստահեցրեց, որ որդու նկատմամբ զրպարտություն է իրականացվում։
– Պարոն Մելիքյան, Ձեր որդին հետախուզման մեջ է։ Ի՞նչն է պատճառը։
– Սաղ զրպարտանք ա։ Ինքը առողջականով բան ունի, էսա կդզվի ու ինքը կասի՝ որը որից հետո ա։
– Որտե՞ղ է նա հիմա։
– Իրա վիճակը… Մի քիչ առողջականի հետ կապված խնդիրներ կան։
– Նա Հայաստանո՞ւմ է գտնվում։
– Հա՛։
– Կոնկրետ որտե՞ղ է գտնվում Ձեր որդին։
– Հայաստանում չի։
– Իսկ որտե՞ղ է։
– Էստեղ չի։ Դրսում ա..
– Շահերի պաշտպան, փաստաբան ունի՞։
– Չէ՛., ի՞նչ ենք անում փաստաբանը։ Եթե ոչ մի բան չկա, փաստաբանն ի՞նչ ենք անում։
– Դանակահարության մասին է խոսվում… Դուք տեղյա՞կ եք Ձեր որդու մասնակցության մասին։
– Չէ հա, ի՞նչ դանակահարություն։ Չկա նման բան… (խմբ. ծիծաղում է)։ Զրպարտանք ա սաղ։ Երեւույթ ա, որը ուզում են իրանց համար օգտագործեն։
Տաթեւ ՀԱՐՈՒԹՅՈՒՆՅԱՆ
Հոդվածն ամբողջությամբ կարող եք կարդալ «Ժողովուրդ» թերթի այսօրվա համարում
