Լրագրողների հարցին, որ վարչապետը խոսեց խնայողություններից, իսկ Երեւանի քաղաքապետարանը ամենաշռայլ գերատեսչություններից է, որ միշտ շռայլ ծախսեր է թույլ տվել, 2017-ին ինչպե՞ս եք պատրաստվում ձգել ձեր գոտիները՝ Կամո Արեյանը չհամաձայնեց, որ շռայլ են եղել. «Բառերդ շատ էին դաժե՝ շռայլ, գոտի, ձգել: Մենք շռայլ հիմնարկներից չենք եղել: Համամիտ չեմ ձեր հետ»:
Նա ասաց, որ քաղաքապետարանը միշտ խնդիր է ունեցել անընդհատ բարձրացնելու ծախսերի արդյունավետությունը. «Կրճատումները եւ խնայողությունները ինքնանպատակ չպետք է լինեն, պետք է դրանք լինեն հիմնավոր, արդյունավետ, իսկ որ այդ խնայողությունների ռեժիմը եւ քաղաքականությունն ու սկզբունքը իրեն միշտ զգացնել է տալիս՝ դա անխուսափելի է: Մեր ամեն տարվա աշխատանքում այդ խնայողությունները կան»:
Նա ասաց, որ արդեն խնայողության են գնացել եւ կրճատել 26 մեքենա. «Այս տարվա բյուջեն բավականին սեղմ է ծախսերի մեջ: Մենք արդեն նախապատրաստել ենք որոշումը ԾԻԳ-երի լուծարման՝ կոնկրետ քայլերով»:
Մեր հարցին՝ խնայողություններից խոսեցիք, այսինքն, այլեւս չե՞ն լինելու թանկարժեք կոնյակներ, ճոխ նվերներ՝ Կամո Արեյանը պատասխանեց. «Ներկայացուցչական ծախսերն անհրաժեշտ են եւ անխուսափելի: Բայց դրանք լինելու են չափավոր, բյուջեի հնարավորության շրջանակներում՝ առանց ավելորդ շռայլությունների»:
Կարդացեք նաև
Լրագրողները ճշտեցին՝ նախկինում կայի՞ն շռայլություններ, որ այս տարի չի լինելու՝ փոխքաղաքապետը պատասխանեց, որ երբ ծախսերը բյուջեների նայում են, տարեցտարի գնացել են խնայողությունների, ներկայացուցչական ծախսեր, միջոցառումներ, գործուղումներ եւ այլն: Այդ հարցում, ըստ նրա, լուրջ տնտեսումներ են արել:
Հարցին՝ քաղաքապետարանում պրիմիտիվ գողություններ կա՞ն, որի մասին խոսում էր վարչապետը՝ Կամո Արեյանը պատասխանեց. «Ըստ անհրաժեշտության եւ շատ սեղմ են մեր գործուղումները»:
Հռիփսիմե ՋԵԲԵՋՅԱՆ
