«Հայելի» մամուլի ակումբում այսօր «Հիմնադիր խորհրդարանի» եւ «Սասնա ծռեր» շարժման անդամ Ալեք Ենիգոմշյանը ներկայացրեց շարժման՝ օրերս հրապարակած փաստաթուղթը, որում նախանշված են «Նոր հանրապետություն ստեղծելու հրամայականներն ու անելիքները»:
Ալեք Ենիգոմշյանը տեղեկացրեց, որ նոր հանրապետության ստեղծումը ենթադրում է երկու փուլ. «Առաջինում իշխանափոխության իրականացումն է, որից հետո նախատեսվում է երկու տարի տեւողությամբ անցումային փուլ: Այդ ընթացքում պետք է իրականացվեն մեր նպատակները՝ Հայաստանի ապագաղութացում, ինքնիշխանության հաստատում, նոր Սահմանադրության ընդունում»:
Առաջին փուլի իրականացման համար Ալեք Ենիգոմշյանը ժամկետներ նշելը տրամաբանական չհամարեց. «Դա մոբիլիզացիայից է կախված եւ կազմակերպչական աշխատանքների ծավալից: Շատ ենք կարեւորում համազգային ներուժի ներգրավումը»:
Aravot.am-ը հետաքրքրվեց՝ ի՞նչ մեթոդներով են նախատեսում հասնել իշխանափոխության: «Վաղուց ապացուցված է, որ այս վարչախմբի օրոք ընտրություններ չկան, հույսը դնել դրանց վրա՝ անիրական է: Երբ քաղաքացիների քվեով փոփոխություն իրականացնելը հնարավոր չէ, ժողովրդի իրավունքն է ընդվզման ճանապարհով հասնել իրական փոփոխությունների եւ իշխանափոխության: Ընդվզումն իրենից ներկայացնում է քաղաքացիական անհնազանդության բոլոր լեգիտիմ միջոցները: Երբ իշխանությունները բռնատիրական են, քաղաքացիներն իրավունք ունեն նաեւ բռնությամբ պատասխանել: Քանի դեռ չկա նման մոտեցում, քաղաքացիական ընդվզումը կգնա խաղաղ ճանապարհով»,-պատասխանեց Ալեք Ենիգոմշյանը:
Կարդացեք նաև
Հավելենք՝ «Սասնա ծռեր» շարժման փաստաթուղթը ենթադրում է, որ Հայաստանը պետք է դուրս գա ԵԱՏՄ-ից եւ ՀԱՊԿ-ից, իսկ Արցախը պետք է միացվի Հայաստանին. «Դավաճանական մոտեցումների պատճառով Արցախը հռչակվեց առանձին հանրապետություն եւ չմիացվեց Հայաստանին: Արցախյան հարցը կախված վիճակում է պահում Հայաստանը»,-ասաց Ալեք Ենիգոմշյանը:
Նա նաեւ նշեց, որ փաստաթուղթը ստորագրած անձանց անունների շարքում նշված է նաեւ Ժիրայր Սեֆիլյանի անունը. «Նա չի լռել եւ չի լռում»:
Ալեք Ենիգոմշյանը նաեւ վստահություն հայտնեց, որ առաջիկայում եւս կլինի հուլիսյան ժողովրդական մոբիլիզացիան:
Լուիզա ՍՈՒՔԻԱՍՅԱՆ
