«Տեսակետ» մամուլի ակումբում այսօր Aravot.am-ը քաղաքագետ Հրանտ Մելիք-Շահնազարյանին խնդրեց մեկնաբանել ԵԱՀԿ Մինսկի խմբի՝ ԱՄՆ-ն ներկայացնող համանախագահ Ջեյմս Ուորլիքի տեսակետը, թե. «Մենք ողջունում ենք Ալիեւի հայտարարությունը ԼՂ կարգավիճակի մասին»:
Հիշեցնենք՝ հոկտեմբերին Ալիեւն ասել էր. «Ինքնավար հանրապետության կարգավիճակն է առավելագույն փոխզիջումը Ղարաբաղի հարցում, որին պատրաստ է այսօր գնալ Ադրբեջանը: Եվ սա համահունչ է այն առաջարկներին, որոնք Մինսկի խմբի միջնորդներն առաջ են քաշում»:
Քաղաքագետն ասաց, որ Ալիեւի մոտեցումներն ինչ-որ չափով փոխվել են. «Նախկինում նա բացառում էր ցանկացած զիջում հայկական կողմին: Սա ինչ-որ չափով Ալիեւի դիրքորոշման մեղմացումն է, հնարավոր է՝ Ուորլիքը դա է փորձել ընդգծել, բայց դա հարցի կարգավորման հեռանկար չի կարող դիտվել: Արցախի իշխանություններն արձագանքել են Ալիեւի հայտարարությանը՝ ասելով, որ դա այն չէ, ինչի համար պայքարում է արցախահայությունը»:
Կարդացեք նաև
Անդրադառնալով սահմանային իրավիճակին՝ բանախոսն ասաց, որ ակտիվություն կա. «Մեր զինված ուժերը բավականին շուտ են բացահայտում թշնամու գործողությունները եւ կարողանում են հակադարձել: Ադրբեջանի վերջին դիվերսիոն փորձից հետո երեկ իրենց մամուլում տեղեկություններ հրապարակվեցին եւս մեկ զոհի մասին: Ենթադրում եմ, որ ձախողված դիվերսիայի հետեւանքներն են: Ըստ էության, Ադրբեջանի երեք զոհի անուն հայտնի է: Կարելի է ասել՝ դիրքային պայքար է ընթանում սահմանում»:
Լուիզա ՍՈՒՔԻԱՍՅԱՆ
