Նոյեմբերի 1-ին Հայաստանի ճարտարապետների միության շենքում քննարկվեց հոկտեմբերի 27-ին պայթեցված Առաջին տպարանի կառուցապատման նախագիծը: Ճարտարապետների միության նախագահ Մկրտիչ Մինասյանը նշեց, որ Քաղաքաշինության մասին օրենքի համաձայն՝ ցանկացած նախագիծ անցնում է փորձաքննություն, քննարկվում է:
«Քոնսեկոարդ» ՍՊԸ-ի տնօրեն Վռամ Թեւոսյանը նշեց, որ Առաջին տպարանի կառուցապատման նախագծի հարցով երկու հանդիպում է նախատեսված, որոնցից առաջինը, դեռեւս մտադրությունների ու ընդհանուր տեղեկությունների մասին ծանուցում է, իսկ երկրորդ հավաքի ժամանակ ամեն ինչ ավելի հստակ կլինի:
Կարդացեք նաև
Նրա տեղեկացմամբ, Առաջին տպարանի տեղում հյուրանոցային համալիր է կառուցվելու, ուսումնասիրվել են, որ քանդման աշխատանքների ժամանակ ինչ քանակի չդիֆերենցված փոշի եւ թունավոր նյութեր են առաջանալու: Ըստ նախնական հաշվարկի, այդ աշխատանքների ընթացքում 560 կգ փոշի, 399 կգ ածխածնի մոնօքսիդ, 43 կգ ծծմբի երկօքսիդ եւ այլ նյութեր կարտազատվեն: Իսկ շինարարական աշխատանքները կձգվեն երկու տարի: Մասնագետը հավելեց, որ արտանետումները կլինեն 90 օրվա ընթացքում, կբարձրանա նաեւ աղմուկի մակարդակը, որը դեռ չի հաշվարկվել:
Նա նշեց, որ շինարարական աշխատանքները պետք է իրականացվեն ցերեկային ժամերին, ու աղմուկն էլ չպետք է գերազանցի 55 դեցիբելը: Ներկայացնելով իրավիճակը՝ Վռամ Թեւոսյանը տեղեկացրեց, որ հիմնական բնապահպանական ռիսկերը կապված են լինելու կաթսայատան աշխատանքների հետ:
Ճարտարապետները տեղեկացան նաեւ, որ երկու տարի առաջ 15 հարկանի բնակելի համալիր կառուցելու նախագիծ էր արվել, հարցը քննարկվել էր քաղաքաշինական խորհրդում ու Ճարտարապետների միությունում, եւ դեռ այն ժամանակվանից պարզ էր, որ տպարանի մեջտեղի մասը քանդվելու է, իսկ կողքի հատվածները պահպանվելու են: Այժմ պատվիրատուն փոխվել է, եւ շենքի հարկերն էլ կրճատվել են մինչեւ 10:
Ճարտարապետների միության նախագահ Մկրտիչ Մինասյանը շինարարին ու կառուցապատողին հորդորեց պահպանել տպարանի հատվածները:
Առաջին տպարանի տարածքի սեփականատերը՝ «Մաքուր երկաթ» ՓԲԸ նախկին գլխավոր տնօրեն Գենիկ Կարապետյանը հայտարարեց, որ այս պահին դադարեցված են նախագծային աշխատանքները: Նա դիմեց Ճարտարապետների միությանը. «Թող հարցը մասնագետներն ուսումնասիրեն, որ թյուրիմացություններ չլինեն, որ վաղը ճարտարապետները չասեն, թե աղավաղեցին Թամանյանին: Ուզում եմ արագ կերպով քննարկումներ կազմակերպենք: Մենք ոչ թե ուզում ենք քաղաքին վատություն անել, այլ տուրիստների համար հետաքրքիր դարձնել: 98-ից այդ շենքը սեփականաշնորհված էր եւ բարձիթողի վիճակում էր»:
Նրա համոզմամբ, տպարանի շենքի ներս ընկած մասը, միեւնույն է, չէր երեւում, արժեքավոր բան չէր, ի տարբերություն փողոցին նայող երկու «թեւերի»:
Գոհար ՀԱԿՈԲՅԱՆ
