«Կարծում եմ՝ Մինսկի խմբին չի հաջողվել պայմանավորվածություն ձեռք բերել՝ Համբուրգում երկու երկրների արտգործնախարարների հանդիպում կազմակերպելու համար, այլապես լրացուցիչ նախապատրաստական աշխատանք տանելու անհրաժեշտություն չէր լինի»,-«Տեսակետ» մամուլի ակումբում այսօր անդրադառնալով ԵԱՀԿ Մինսկի խմբի համանախագահների՝ վերջերս տարածաշրջան կատարած այցի արդյունքներին՝ ասաց քաղաքագետ Հրանտ Մելիք-Շահնազարյանը:
Նա ՀՀ եւ Ադրբեջանի նախագահների հանդիպման կազմակերպումը ներկայումս տրամաբանական չի համարում, քանի որ Ալիեւը հրապարակայնորեն հրաժարվել է Վիեննայի եւ Սանկտ-Պետերբուրգի հանդիպումների պայմանավորվածություններից:
«Քանի դեռ դրանք կյանքի չեն կոչվում, ՀՀ-ի համար անիմաստ է նման նոր հանդիպում ունենալը: Այդ հանդիպումից խուսափում է Ալիեւը: Ադրբեջանական կողմի համար բանակցային գործընթացում խնդրահարույց իրավիճակ է ստեղծվել. պատերազմ չվերսկսելը այլեւս չեն կարող ներկայացնել որպես զիջում: Նաեւ անհավատալի են սպառնալիքները, թե կարճ ժամանակում կարող են հարցը լուծել ռազմական ճանապարհով: Ալիեւը խոստովանեց, որ իր վրա ճնշում են գործադրում եւ ստիպում ճանաչել ԼՂՀ անկախությունը: Քանի դեռ իրավիճակ չի փոխվել բանակցային սեղանի շուրջ, նա կխուսափի հանդիպել, ուստի փորձելու է իրավիճակը լարելու միջոցով նոր իրավիճակի հասնել: Այդ ընթացքում էլ կփորձեն խուսափել հանդիպել Սերժ Սարգսյանի հետ, եթե արտաքին ճնշումն այդ հարցում մեծ չլինի»,-նկատեց Հրանտ Մելիք-Շահնազարյանը:
Նրա բնորոշմամբ՝ այս ընթացքում ԵԱՀԿ Մինսկի խումբը եւս կփորձի ժամանակ շահել. «Նոր նշանակված ֆրանսիացի համանախագահին ժամանակ է պետք, որ ներգրավվի խմբի աշխատանքներին»:
Կարդացեք նաև
Լուիզա ՍՈՒՔԻԱՍՅԱՆ
