ԱԺ կառավարության աշխատակազմի ղեկավար-նախարար Դավիթ Հարությունյանը չի բացառում, որ խորհրդարանական ընտրությունների ժամանակ տեղամասերում տեսախցիկների տեղադրման համար գումարները չբավարարեն: Այդ մասին այսօր նա ասաց խորհրդարանում լրագրողների հետ զրույցում:
«Տեսախցիկների հետ կապված տեխնիկական խնդիր լինել չի կարող: Բոլորիդ մոտ էլ տեսախցիկ կա: Խնդիրը կարող է լինել, որ գումարները չբավարարեն եւ այդ պատճառով որեւէ կազմակերպություն հանձ չառնի կատարելու այդ աշխատանքը»,- ասաց նա:
Հիշեցնենք, որ ԵՄ-ն երկու միլիոն եվրո է խոստացել Հայաստանին այդ նպատակով:
Լրագրողներից մեկը հիշեցրեց, որ ԱԺ ՀԱԿ խմբակցության ղեկավար Լեւոն Զուրաբյանն ահազանգել էր, թե ինչ-որ խոշոր ընտրակեղծարարներ ցանկանում են չեղարկել համաձայնագրի այդ հատվածը:
Կարդացեք նաև
«Առաջարկում եմ, որ պարոն Զուրաբյանին հարց ուղղեք`ո՞վ է նման բան ասում»: Դավիթ Հարությունյանը մանրամասնեց, որ տեսախցիկների մասով որեւէ կազմակերպության հետ դեռեւս բանակցություններ չեն ընթանում: Գնումը կատարվելու է սովորական բաց գնում սկզբունքով. այն կազմակերպությունը, որը կբավարարի եռակողմ հանձնաժողովի որակական պահանջներին, այն էլ կմասնակցի. «Այդ իսկ պատճառով առաջին իսկ օրվանից շեշտադրել ենք, որ պատասխանատվությունը չի լինելու միայն կառավարության ուսերին: Լինելու է եռակողմ հանձնաժողով, որտեղ կառավարությունը լինելու է փոքրամասնություն: Մեծամասնությունը կլինեն ընդդիմությունը եւ քաղհասարակության ներկայացուցիչները»:
Նելլի ԳՐԻԳՈՐՅԱՆ
