«Ողջունում եմ, որ պայթեցման հետ կապված արձագանք եղավ, բայց կուզեի նաեւ, որ հատկապես` կենտրոնում ու հատկապես` հին շենքերի` հուշարձանների հետ կապված վերաբերմունքն էլ փոխվեր»,-Aravot.am-ի հետ զրույցում ասաց ճարտարապետ Արսեն Կարապետյանը` մեկնաբանելով վարչապետ Կարեն Կարապետյանի այսօրվա հանձնարարականը, որն առնչվում է հոկտեմբերի 27-ին տպարանի շենքի պայթեցմանը:
Վարչապետն այսօր կառավարությունում տպարանի շենքի շուրջ ստեղծված աղմուկի առիթով աշխատանքային խորհրդակցություն է հրավիրել, որին ներկա է եղել նաեւ տարածքի սեփականատերը: Կարեն Կարապետյանը ասել է. «Սա փորձադաշտ չէ: Սա ռազմական պոլիգո՞ն է, ի՞նչ է: Իրականում այն տպավորությունն է, որ այս քաղաքում ով ինչ ցանկանա՝ կարող է անել: Ինչպե՞ս են մարդիկ որոշել, որ պետք է պայթեցնել, ո՞ւմ պետք է տեղյակ պահեին եւ ո՞վ պետք է բնակիչներին տեղեկացներ»:
Հիշեցնենք, որ հոկտեմբերի 27-ին, պայթեցնելու միջոցով տարածքի սեփականատերը քանդել է Երեւանի կենտրոնում գտնվող 100 տարվա պատմություն ունեցող առաջին տպարանի շենքը, ինչը հասարակության շրջանում դժգոհության մեծ ալիք էր բարձրացրել:
Ճարտարապետ Արսեն Կարապետյանը տպարանի շենքի հետ կապված ֆեյսբուքյան իր էջում դիմել էր կառավարությանը գրելով` «Օրը ցերեկով պայթեցվեց Երեւանի լավագույն շենքերից մեկի՝ Հանրապետության եւ Վարդանանց փողոցների խաչմերուկում գտնվող տպարանի մի մասը: Շենքը կառուցվել է 1920-ականներին, լավ պահպանված էր, եզակի է, այս պահին ժամանակ չունեմ նյութեր գտնելու, բայց եթե չեմ սխալվում, Թամանյանն էր սկսել նախագծումը, հետո ուրիշ ճարտարապետ էր ավարտել:
Դիմում եմ ձեզ, քանի որ դուք զբաղվում եք մշակույթով, քաղաքաշինությունով, տուրիզմով, մարդու իրավունքներով, առողջապահությունով եւ բնապահպանությունով:
Նախ, այս շենքը կարելի էր օգտագործել, վերանորոգել, ադապտացնել եւ այլն, բայց ոչ երբեք՝ պայթեցնել կամ քանդել»:
Կարդացեք նաև
Մեզ հետ զրույցում Արսեն Կարապետյանն ասաց. «Հուշարձանների ցանկը Աստվածաշունչ չէ, թերի է, եւ պետք է վերանայվի»: Ըստ ճարտարապետի հուշարձանների ցանկն էլ թերի է եւ վերանայման կարիք ունի:
Անդրադառնալով պայթեցման միջոցով շենքը քանդելուն, ճարտարապետն ասաց, որ այդ եղանակով հին շենքից ազատվելն ավելի արագ է եւ քիչ ծախսատար, բայց այդ միջոցով քանդում են, եթե այն հեռու է բնակավայրերից, եւ խիտ կառուցապատված տարածքում չէ:
Արսեն Կարապետյանը կառավարությանը հասցեագրված կոչում նաեւ գրել էր. «էկոլոգիայի տեսակետից, քաղաքի կենտրոնում այսպիսի բարբարոսությունը պետք է իրավական գնահատականի արժանանա: Բացի փոշուց եւ մնացածից, ասում են, որ նույնիսկ հարեւաններին չեն զգուշացրել»:
Այս առնչությամբ էլ վարչապետը նշել է. «Առաջինը՝ շինարարը կամ սեփականատերը պետք է տեղեկացներ համայնքի համապատասխան ատյաններին, որ շենքն ապամոնտաժելու են ոչ թե այս կամ այն եղանակով, այլ՝ պայթեցման: Այդ իսկ պատճառով, պետք է հասկանալ, թե ինչ պատիժ է հասնում սեփականատիրոջը կամ շինարարին և նրա նկատմամբ կիրառել առավելագույն պատիժը: Երկրորդ՝ լիցենզավորված կառույցը, որը պայթեցրել է շենքը, պետք է իր լիցենզիային համապատասխան պաշտոնապես տեղեկացներ բնակչությանը: Չի տեղեկացրել, ուստի նրա նկատմամբ եւս պետք է կիրառել առավելագույն պատիժ»:
Լուսինե ԲՈՒԴԱՂՅԱՆ
