Ազգային ժողովի պաշտպանության, ազգային անվտանգության եւ ներքին գործերի ու ֆինանսավարկային եւ բյուջետային հարցերի մշտական հանձնաժողովների համատեղ նիստի ընթացքում արտակարգ իրավիճակների նախարար Արմեն Երիցյանը զեկույցով հանդես եկավ: Նա նշեց, որ ԱԻՆ-ին 2017 թվականի բյուջեով տրամադրվել է 11 միլիարդ 244 միլիոն դրամ, որի 89.2 տոկոսը կազմում են աշխատավարձերը։
«Մնում է 1 միլիարդ 212 միլիոն դրամ, այստեղ մենք ունենք էներգետիկա, համազգեստ վառելիք եւ այլն: Ընդհանուր առմամբ, գումարի հիմնական մասը՝ մոտավորապես 7 միլիարդը տրամադրվում է փրկարար ծառայությանը: Փրկարար ծառայությունում նույնպես 89.3 տոկոսն աշխատավարձն է»,- ասաց նա:
Արմեն Երիցյանը առանձնացրեց Ռուսաստանի Դաշնության հետ համագործակցությունը, ինչի արդյունքում տեղի է ունեցել Կոտայքի մարզի Գետարգել համայնքում հայ-ռուսական հումանիտար կենտրոնի բացումը. «Մենք այնտեղ լուրջ աշխատանք ենք տարել, եւ այնտեղ մենք պայմանագիր ստորագրեցինք, որին մասնակցում էր նաեւ Հայաստանի Հանրապետության նախագահը: Պայմանագիր ստորագրեցինք եւ 2016-2018 թվականների ընթացքում Ռուսաստանի Դաշնության կողմից 36 միլիոն գումարի չափով հատկացվում են հրշեջ մեքենաներ եւ տարբեր մեքենաներ»:
Արմեն Երիցյանը հավելեց, որ նախարարությունը Ռուսաստանի Դաշնության եւ ՄԱԿ-ի հետ բնակչության ազդարարման ուղղությամբ լուրջ աշխատանք է կատարում. «Մենք ամբողջ հանրապետությունում պետք է տեղադրված շչակներ ունենանք: Եվ արդեն լուրջ աշխատանքներ ենք կատարել՝ շչակները տեղադրված են Երեւանի կենտրոնում եւ Տավուշի մարզում: Մենք այսպես շարունակում ենք աշխատանքները, եւ 14 հեռուստաընկերությունների, 13 ռադիոընկերությունների հետ պայմանագիր ենք կնքել, եւ յուրաքանչյուր պահին կարող ենք հաղորդել, որ դեպք է տեղի ունենալու»:
Կարդացեք նաև
Արմեն Երիցյանը ընդգծեց, որ Ճապոնիայի գործընկերները մոտ 2 միլիոն դրամի չափով ԱԻՆ-ի համար հատուկ շտաբային մեքենաներ են գնել, 3 միլիոնի չափով սողանքների դեմ պայքարի տեխնիկա են նվիրել, ինչը, ըստ նախարարի, մեծ ձեռքբերում է նախարարության համար: Արմեն Երիցյանը նշեց նաեւ, որ նախատեսվում է մոտավորապես 15 միլիոն դոլարի չափով 41 հրշեջ մեքենա գնել, որոնք կտրամադրվեն Շիրակի, Գյումրու եւ Սյունիքի մարզերին։
Ամի ՉԻՉԱԿՅԱՆ
