Ազգային ժողովի պաշտպանության, ազգային անվտանգության եւ ներքին գործերի ու ֆինանսավարկային հարցերի մշտական հանձնաժողովը հոկտեմբերի 31-ին դռնփակ նիստ է գումարել: Նիստի օրակարգում էր «Հայաստանի Հանրապետության 2017թ պետական բյուջեի մասին» օրենքի նախագծում պաշտպանության նախարարության նախատեսված եկամուտները եւ ծախսերը:
Պաշտպանության նախարարը մինչ հանձնաժողովի նիստը լրագրողների հետ զրույցում անդրադարձավ ՊՆ բյուջեին:
«Հաշվի առնելով, որ պաշտպանության նախարարության բյուջեն հասկանալի պատճառներով փակ է, ես ձեզ կարող եմ ընդհանուր քաղաքականության առումով ասել, որ բյուջեի մեծ ավելացում չի սպասվում: Այն, ինչ նախատեսվում է, բնականոն աճի շրջանակներում է, բայց մենք ունենք ներքին լուրջ վերաբաշխումներ՝ կապված խնայողությունների հաշվին մարտական եւ սպառազինության, ինչպես նաեւ ներսում ռազմաարդյունաբերական համալիրի զարգացման վրա՝ գումարների ավելացման առումով: Դա պաշտպանության նախարարության քաղաքականությունն է, եւ այդ քաղաքականությունը՝ եկող տարում: Մենք դեռ ունենք ժամանակահատված մինչեւ բյուջեի ավարտական փուլին հասնելը, եւ այդ ժամանակն օգտագործվելու է նաեւ այդ ուղղությամբ»,- ասաց նա:
Նախարարը հրաժարվեց պատասխանել լրագրողների հարցերին:
Կարդացեք նաև
Ամի ՉԻՉԱԿՅԱՆ
