«Նախկինում Թուրքիային ձեռնտու էր անորոշ վիճակը, երբ Աթեշյանը գործակցում էր իրենց հետ: Հիմա տեսնենք՝ այս անգամ ի՞նչ կպատասխանեն: Կարծում եմ՝ հարցի պատասխանը կերկարացվի: Թուրքիան ներքին կյանքում խնդիրներ ունի լուծելու՝ ավելի կարեւոր: Առայժմ ժամանակ չեն գտնի անդրադառնալու եւ ընտրությունների հարցը կձգձգեն»,-այսօր «Տեսակետ» մամուլի ակումբում անդրադառնալով Պոլսո հայոց պատրիարքի ընտրությունների անցկացմանը՝ ասաց թուրքագետ Անուշ Հովհաննիսյանը:
Ըստ նրա՝ նշյալ հարցը Թուրքիայի իշխանությունների օրակարգ կմտնի այն ժամանակ, երբ որոշակիանան այդ երկրի տարածաշրջանային քաղաքականության եւ սահմանադրական հանրաքվեի հարցերը:
Թուրքագետը կարծում է, որ առաջիկայում սահմանադրական փոփոխություններ անցկացնելու գործընթացը նպատակ ունի փոխելու երկրի կառավարման համակարգը՝ այն խորհրդարանական հանրապետությունից դարձնելով գործադիր նախագահական հանրապետություն: Թե ինչպիսին է լինելու Թուրքիայի նոր սահմանադրությունը, ըստ բանախոսի, պարզ կլինի հունվարին:
Այդ համատեքստում Թուրքիայի ազգային փոքրամասնությունների, այդ թվում՝ հայերի համար Անուշ Հովհաննիսյանը դրական միտումներ չի տեսնում, քանի որ Թուրքիայում անհանդուրժողական տրամադրություններ են տիրում հատկապես փոքրամասնությունների հանդեպ. «Թուրքիան վերափոխվում է եւ դառնում Էրդողանի նոր Թուրքիա, որն իսլամականացված՝ սունիականացված է եւ ազգային դրսեւորումների դեմ անհանդուրժող տեսք ունի»:
Կարդացեք նաև
Լուիզա ՍՈՒՔԻԱՍՅԱՆ
