Հոկտեմբերի 29-ին Ղազախստանի Ակտոբե քաղաքում «Ուրարտու» հայկական համայնքի ջանքերով Ռուս Ուղղափառ եկեղեցու տարածքում տեղի ունեցավ խաչքարի բացումը։ Այն Ակտյուբինսկի մարզում առաջին հայկական քրիստոնեական խորհրդանիշն է։
Բացման արարողությանը մասնակցում էին մարզի ակիմի (մարզպետի) տեղակալ Ասկար Շերիյազդանովը, ՂՀ-ում ՀՀ հյուպատոս Մհեր Բադալյանը, ՂՀ և ՌԴ տարբեր քաղաքներից ժամանած համայնքների նախագահներ, Ակտոբեի հայկական համայնքի բազմաթիվ ներկայացուցիչներ, քաղաքի իմամը և տեղի բնակիչներ։ Խաչքարը օծեցին Հայ Առաքելական եկեղեցու Տաշքենդ քաղաքի «Սուրբ Փիլիփոս» եկեղեցու քահանա Ղազախստանի եւ Ուզբեկիստանի հայերի հոգեւոր հովիվ տեր Հովհաննես Գրիգորյանը եւ Աստրախանի Հայ Առաքելական «Սուրբ Ռիփսիմե» եկեղեցու քահանա, տեր Մարկոս Սարգսյանը:
Շնորհավորելով հայ համայնքին Հայաստանի դեսպանության եւ դեսպանի անունից խաչքարի տեղադրման կապակցությամբ Մհեր Բադալյանը նշեց, որ այս օրը հոգեւոր տոն է Ղազաղստանում ապրող հայերի համար:
«Առավոտ»-ի հետ զրույցում «Ուրարտու» համայնքի ղեկավար Հայկ Տերտերյանը ընդգծեց, որ «խաչքարը մի սրբատեղի, կոթող է այստեղ բնակվող մոտ երկու հազար հայերի համար, քանի որ Ակտոբե քաղաքում չկա հայկական եկեղեցի»:
Կարդացեք նաև
Գրանիտե խաչքարը պատրաստվել է Երեւանում եւ տեղափոխվել Ակտոբե քաղաք: Այն թվով 7-րդն է, որը տեղադրվում է Ղազախստանում:
Տիգրան Հովհաննիսյան
