Բրյուսելյան կաղամբը հայաստանյան շուկայում համեմատաբար նոր երեւույթ է: Չնայած իր օգտակարությանը՝ այս բանջարեղենն ինքն իրենով առանձնապես համեղ չէ, եւ այն գրավիչ դարձնելու համար պետք է համեմել տարբեր թանձրուկներով, համադրել այլ մթերքների հետ:
Անհրաժեշտ մթերքները
Բրյուսելյան կաղամբ- 0,5 կգ
Սունկ (կարող եք վերցնել միայն ագարիկոն (շամպինյոն) տեսակի կամ խառը՝ պորտոբելո եւ ագարիկոն)- 0,5 կգ
Մանր գլուխ սոխ- 4-5 հատիկ
Սխտոր-2-3 պճեղ
Բուսական յուղ- 2-3 ճաշի գդալ
Սպիտակ չոր գինի- 50 գրամ
Թթվասեր- 4 ճաշի գդալ
Համեմունքներ- ըստ ճաշակի՝ աղ, սեւ պղպեղ, խմելի սունելի, չորացրած ուրց եւ սամիթ
Թարմ սամիթ կամ համեմ եւ քունջութ՝ զարդարելու համար
Կարդացեք նաև
Պատրաստման եղանակը
Բրյուսելյան կաղամբիկները մաքրել՝ վրայի շերտը հեռացնել, լվանալ: Մաքրել եւ լավ լվանալ նաեւ սունկն ու սոխը:
Թավայի մեջ տաքացնել բուսայուղը, բանջարեղենները լցնել մեջը: Եթե չունեք մանր գլուխ սոխ, ապա վերցրեք մի հատ մեծը եւ շերտատեք, կարող եք շերտատել նաեւ կաղամբն ու սունկը:
Տապակեք բոլոր բանջարեղենները միասին մոտ 20 րոպե՝ պարբերաբար խառնելով, ավելացրեք գինին, թողեք շոգեխաշվի, ապա ավելացրեք բոլոր համեմունքները եւ թթվասերը: Եվս 5-7 րոպե թթվասերով շոգեխաշվելուց հետո անջատեք, ավելացրեք մանրած թարմ կանաչին եւ քունջութը: Կարող եք մատուցել ե՛ւ որպես խավարտ՝ հավի ու ձկան հետ, ե՛ւ որպես ինքնուրույն ուտեստ:
Բարի ախորժակ:
Պատրաստեց
ՄԵԼԱՆՅԱ ԲԱՐՍԵՂՅԱՆԸ
«Առավոտ»
29.10.2016
