«Ինձ համար զարմանալի, անընդունելի է»,- երեկ «Մեդիա կենտրոնում» լրագրողների հետ հանդիպման ընթացքում ասաց քաղաքական գործիչ Անդրիաս Ղուկասյանի կին, ճարտարապետ Անահիտ Թարխանյանը՝ խոսելով ամուսնու գործի մասին:
Հիշեցնենք, որ Վերաքննիչ քրեական դատարանը երեքշաբթի մերժել էր Անդրիաս Ղուկասյանի գործով բողոքը խափանման միջոցի երկարացման եւ գրավի կիրառման վերաբերյալ: Անդրիաս Ղուկասյանին մեղադրանք է առաջադրվել ՀՀ քրեական օրենսգրքի 225-րդ հոդվածի 1-ին մասով, այն է` զանգվածային անկարգություններ կազմակերպելը:
Ըստ Անահիտ Թարխանյանի, աննախադեպ մի երեւույթ է, երբ նախագահի թեկնածուին ձերբակալում են եւ անազատության մեջ են պահում, եւ միջնորդությունները եւս մերժվում են. «Բոլոր քաղաքական գործիչները արտահայտվել են եւ ստորագրել են ի օգուտ Անդրիասի երաշխավորել են, եթե փոխվի խափանման միջոցը, եթե փոխվի ինքը չի խոչընդոտի, ինքը պատշաճ անձնավորություն է: Ես ուզում եմ հասկանալ՝ չէ՞ որ ամեն պատգամավորի հետեւում կանգնած է մի մեծ ընտրական խումբ, կանգնած են հազարավոր մարդիկ, ոչ թե հազարավոր, այլ տասնյակ, հարյուր հազարավոր մարդկանց մասին է խոսքը, որոնք երաշխավորում են Անդրիասի համար»:
Անահիտ Թարխանյանը նշեց, որ պետությունը կայանում է հիմնվելով երկու կարեւոր մույթերի վրա՝ օրենսդրության եւ բարոյականության. «Ինչպիսի բարոյականության մասին կարելի է խոսել, երբ քրիստոնեական կարեւորագույն սկզբունքը՝ սուտ մի՛ խոսիր, այստեղ խախտվում է, դրա մեջ ներառվում է նաեւ սուտ մատնությունը: Դրա մեջ հարվածի տակ են դնում ոստիկանությանը»:
Կարդացեք նաև
Ամի ՉԻՉԱԿՅԱՆ
Լուսանկարը՝ Մեդիա կենտրոնի
