Հոկտեմբերի 28-ին Հայաստանի կինեմատոգրաֆիստների միությունում կայացավ Համաշխարհային հայկական կոնգրեսի, Ռուսաստանի հայերի միության, ՀՀ սփյուռքի նախարարության, կինեմատոգրաֆիստների միության մրցանակաբաշխության արդյունքների ամփոփումը: Ներկայացված 11 վավերագրական ֆիլմերից ժյուրին մրցանակները շնորհել է 4 ֆիլմի:
Ասուլիսին ամփոփվեցին հայկական ֆիլմերի մրցանակաբաշխության քվեարկության արդյունքները` Հայաստանի անկախության 25-ամյակի հոբելյանին նվիրված 2016թ. լավագույն վավերագրական ֆիլմերը:
«Համազգային միասնությունը հավաքական ուժի և հզորության գրավական» թեմայով էր: Մրցանակաբաշխությանը ներկայացվել էին 11 ֆիլմ, սակայն ռեժիսոր Վ.Գևորգյանցի «Դարերի կանչը» ֆիլմը ռեժիսորն ինքն էր հանել մրցանակաբաշխությունից: Ներկայացվող ֆիլմերը պետք է համապատասխանեին տրված չափանիշերին, որոնց կինոռեժիսոր Ռուբեն Գևորգյանցը, որը ժյուրիի անդամ էր, անդրադարձավ իր խոսքում. «Ֆիլմը պետք է ունենար նպատակ, միասնության գաղափար, բովանդակություն, անպայման նվիրված լիներ անկախության 25-ամյակին: Կարևոր է նաև ստեղծման տարեթիվը`առնվազն 2 տարի: Ֆիլմերից միայն մեկը` «Փրկության քարտեզը», նվիրված էր Հայոց ցեղասպանությանը:
Կարդացեք նաև
Ֆիլմերը մանրամասն դիտելուց հետո ժյուրին հատուկ փակ քվեարկություն է անցկացրել, որի արդյունքում ընտրվել են 4 ֆիլմ` «Կհաղթենք միայն միասին» (ռեժիսոր Գեորգի Կևորկով), «Փրկության քարտեզ » (ռեժիսոր Արամ Շահբազյան), «Հատուցում» (ռեժիսոր Արտյոմ Երկանյան), 4-րդ խրախուսական մրցանակը տրվել է երիտասարդ ռեժիսոր Արեն Վաթյանին`«Մեր անձնագիրը, մեր հոգսերը» ֆիլմի համար:
Տաթեւ ԿԱՐԱՊԵՏՅԱՆ
