«Արամ Աթեշյանի վարկաբեկված հեղինակությունն այլեւս հնարավոր չէ ձգել, այդ պատճառով գուցե նա այս քայլով գնդակը փոխանցում է թուրքական իշխանություններին: Ութ տարի՝ ինքն է «ձգել ընտրությունները», երեւի ութ տարի էլ թուրքական իշխանությունները կարող են «ձգել»,-հոկտեմբերի 28-ին «Արմենպրես» լրատվական գործակալությունում լրագրողների հետ հանդիպմանը խոսելով Թուրքիայում սպասվելիք հայոց պատրիարքի ընտրությունների մասին, ասաց թուրքագետ Ռուբեն Մելքոնյանը:
Նրա կարծիքով՝ Հայաստանին, Հայ առաքելական եկեղեցուն եւ Թուրքիային ձեռնտու է, որ ի վերջո խնդիրը լուծվի, իսկ սկանդալներն ու շահարկումները մեղմանան, եթե ոչ՝ բացառվեն:
Փորձագետի բնորոշմամբ՝ Տ. Արամ արքեպիսկոպոս Աթեշյանը Ստամբուլի հայ համայնքի շրջանում որեւէ հեղինակություն չունի. «Դժվար է պատկերացնել, որ համայնքը կարող է ղեկավարել մի անձ, որը վերջինիս կողմից չի ընկալվում: Շատ ցավալի երեւույթ է: Բացի այդ, ընտրվելու պարագայում Էրդողանի ցանկացած հարց Աթեշյանը չի կարողանա հայ համայնքում անցկացնել»:
Կարդացեք նաև
Ռուբեն Մելքոնյանը մեկնաբանեց նաեւ տեսակետը, թե Թուրքիայի պարագայում հայերը ճնշված են, եւ Տ. Արամ արքեպիսկոպոս Աթեշյանի գործունեությունն այդ համատեքստում հասկանալի է. «Սա մասամբ է ճիշտ: Իրոք, Թուրքիայում ճնշումները բավականին մեծ են, բայց «միֆ» է, թե պատրիարքն ընդհանրապես չի կարող գործունեությունը տանել ավելի ընկալելի դաշտ: Քեմալ Աթաթուրքի ժամանակ հայոց պատրիարքն ավելի ազատ է գործել, քան Արամ Աթեշյանի փոխանորդության ժամանակ»:
Լուիզա ՍՈՒՔԻԱՍՅԱՆ
