«Մենք Գագիկ Ծառուկյանի հետ աշխատել ենք, որեւէ խնդիր չենք տեսնում: Իր այն մոտեցումը, որ երկրում փոփոխություններ տեղի ունենան առանց արյան՝ դա արդեն ամենալավ դաշտն է, որ կարելի է համագործակցել ցանկացած՝ այդ տրամաբանությամբ առաջնորդվող քաղաքական ուժի հետ եւ գտնել իսկապես ճանապարհներ՝ երկրում արագընթաց փոփոխություններ իրականացնելու»,- այսօր ԱԺ ճեպազրույցների ժամանակ խոսելով Գագիկ Ծառուկյանի հայտարարության մասին, որ հնարավոր է վերադառնա մեծ քաղաքականություն՝ այսպես մեկնաբանեց ՀՅԴ խմբակցության ղեկավար Արմեն Ռուստամյանը:
Նա ասաց, որ չի բացառում, որ Գագիկ Ծառուկյանը կվերադառնա. «Ընդհակառակը, շատ հավանական եմ համարում: Քաղաքականության մեջ ոչ մի բան բացառել չի կարելի: Իսկապես, Հարվարդ պետք չի ավարտել, որ հասկանաս, որ եթե դու չես զբաղվում քաղաքականությամբ, քաղաքականությունը, միեւնույնն է, զբաղվում է քեզնով, այն էլ այն ֆոնի վրա, երբ մենք գնում ենք այնպիսի համակարգային փոփոխությունների, որտեղ քաղաքական դաշտն ակտիվանալու է: Մարդը պետք է իրեն մի կողմ չդնի այդ գործընթացներից»:
Ըստ պարոն Ռուստամյանի, այն տրամաբանությունը, որ ընթացքի մեջ է դրված Հայաստանում, շատերին է ստիպելու ակտիվանալ, որովհետև կողմ քաշվելը սխալ է:
Հարցին՝ քաղաքական դաշտն ունի՞ Գագիկ Ծառուկյանի կարիքը, նա պատասխանեց. «Նրա կարիքն ունեն այն մարդիկ, ում իսկապես Գագիկ Ծառուկյանը բարեգործությամբ փորձում է օգտակար լինել»:
Կարդացեք նաև
Ժամանակին ՀՅԴ-ն ողջունում էր, երբ Գագիկ Ծառուկյանը հեռացավ քաղաքականությունից: Արմեն Ռուստամյանի խոսքերով՝ «Ասում էինք, որ սրանով կանխվեց արյունահեղություն, որ կարող էր իսկապես մեր երկրում տեղի ունենար»:
Ինչ վերաբերում է գրքի փակված էջը բացելուն՝ Արմեն Ռուստամյանն ասաց. «Հայաստանում այնքա՜ն ծալված էջեր են բացվել, եւ այլն, որ այդտեղ որեւէ զարմանալի բան չի կարող լինել, եթե բազմիցս ծալված էջերը բացվեն»:
Թե համաձայնեցվա՞ծ է Գագիկ Ծառուկյանի վերադարձն իշխանությունների հետ՝ պարոն Ռուստամյանը վստահեցրեց, որ իրենց հետ հաստատ համաձայնեցված չէ. «Գագիկ Ծառուկյանն ազատ մարդ է, ինչո՞ւ պետք է համաձայնեցնի»:
Հռիփսիմե ՋԵԲԵՋՅԱՆ
