«Մենք քաղաքական գործիչ չունենք, քաղաքական գործիչ ասելով՝ հասկանում եմ այն մարդուն, որը կարողանում է իրականությունը ճանաչել ու այդ իրականությունը փոխելով՝ ծրագիր կազմել ու գնալ դեպի այդ փոփոխությունը: Այս առումով Գագիկ Ծառուկյանի վերադարձը կամ հեռանալը էական ոչինչ չի փոխի մեր քաղաքական իրականության մեջ: Բայց եթե ինքը վերադառնա ու ԲՀԿ-ն նորից ուժեղացնի, այս դեպքում ընդամենը խաղի կանոններն են փոխվում Հայաստանում… ամեն դեպքում, եթե ԲՀԿ-ն հիմա կայանա ու ուժեղանա, ինչպես ժամանակին էր, կարող է դրական կաշկանդիչ դեր ունենալ իշխանությունների համար»,- այսօր «Բլից ինֆո» ակումբում ասաց քաղաքական վերլուծաբան Արծրուն Պեպանյանը՝ անդրադառնալով ԲՀԿ նախկին առաջնորդ Գագիկ Ծառուկյանի հայտարարությանը՝ եթե անհրաժեշտությունը լինի, հնարավոր է՝ քաղաքականության ծալած էջը բացվի:
Պարոն Պեպանյանի խոսքով, Հայաստանում արմատական ընդդիմություն լինելու ու այդ ճանապարհով իշխանություն փոխելու հնարավորությունը շատ քիչ է. «Փորձը ցույց է տվել, որ հնարավոր չէ: Եթե նույնիսկ ԲՀԿ-ն գա ու ասի՝ արմատական ընդդիմություն ենք, ամենայն հավանականությամբ, կարժանանան այն նույն ճակատագրին, որին արժանացել են բոլոր նախորդ ընդդիմադիր շարժումներն ու առաջնորդները»:
Վերլուծաբանի վերլուծությամբ, այսօր Հայաստանում ընդդիմություն չկա. «Քանի որ քաղաքական դաշտ չկա, ընդդիմություն էլ չկա: Նրանք ավելի շատ պահի տակ ընդդիմանում են գործող իշխանություններին, առաջին դեմքերին: Գաղափարախոսություն, որով առաջնորդվում են նման բան չունեն, իսկ եթե դա չունեն, կախված իրավիճակից՝ իրենք մեկ աջ կարող են թեքվել, մեկ՝ ձախ, համաձայնությունների գնալ: Ընդդիմադիր դաշտ ասվածի մեջ իշխանություններն ավելի շատ բաժնեմաս ունեն, քան՝ ժողովուրդը»:
Անդրադառնալով կառավարության ծրագրին՝ պարոն Պեպանյանը նկատեց, որ սիրուն ծրագիր է. «Բոլոր կառավարությունների ծրագրերն էլ սիրուն են, բայց ոչ մեկը չի իրականացել: Այս նոր կառավարության ծրագիրն էլ նախորդ բոլոր ծրագրերից սիրունն է, բայց իրականացնելու հարցն է մնում օդում կախված: Հնարավո՞ր է այն իրականացնել, թե՝ ոչ: Հարցն այն է, որ այսօր Հայաստանում փոփոխությունների ձգտում է ընդամենը մի մարդ՝ վարչապետ Կարեն Կարապետյանը. իշխանական համակարգը այդ փոփոխությունները չի ուզում, ընդդիմությունը նույնպես չի ուզում, ժողովուրդն էլ անհույս ու անտարբեր է: Իսկ սա շատ ծանր դեպք է: Մենք պետք է փորձենք հասկանալ՝ ինչու այս ծրագիրը ներկայացվեց: Իշխանական համակարգի մեջ չէր հասունացել փոփոխությունների ձգտումը, որտեղից եկավ փոփոխությունների ձգտումը»:
Կարդացեք նաև
Մեր հարցին՝ ընտրություններից առաջ փոփոխությունների իմիտացիայի փո՞րձ է արվում, պարոն Պեպանյանը պատասխանեց. «Էլի ենք տեսել ընտրություններ, ու այս կարգի նախընտրական քայլ չի արվել: Ձևեր են թափել, ամեն ինչ լավ է, այս մեկը մի քիչ դժվար ըմբռնելի է: Առայժմ որոնումների մեջ եմ, վերջնական արդյունք չունեմ, պետք է հասկանալ՝ ինչպես եղավ սա, ովքեր են կնքահայրերը»:
Արփինե ՍԻՄՈՆՅԱՆ
