Գերմանիայի ԱԳՆ-ն չեղարկել է նոյեմբերի 13-ին Ստամբուլում Գերմանիայի գլխավոր հյուպատոսարանում սպասվող համերգը՝ նվիրված Հայոց ցեղասպանությանը:
Հիշեցնենք, ավելի վաղ հաղորդվում էր, որ Ստամբուլում Գերմանիայի գլխավոր հյուպատոսարանում Դրեզդենի սիմֆոնիկ նվագախումբը կկատարի Ցեղասպանությանը նվիրված «Աղետ» ստեղծագործությունը: Ընդ որում, միջոցառմանը մասնակցելու էին հրավիրվել Թուրքիայի նախագահ Ռեջեբ Թայիփ Էրդողանը, վարչապետ Բինալի Յըլդըրըմը, արտգործնախարար Մևլութ Չավուշօլուն և այլ պաշտոնյաներ:
Գերմանիայի ԱԳՆ պաշտոնական ներկայացուցիչ Մարտին Շեֆերը Բեռլինում լրագրողների հետ զրույցում հայտարարել է, որ համերգին հրավիրվածների ցանկը հյուպատոսությունը չէր համաձայնեցրել իրենց հետ:
«Բավականին տարօրինակ է, երբ հրավերները, այդ թվում թուրքական կառավարության և պետության ղեկավարներին ուղղված, տարածվում են՝ առանց հանդիպման տերերի՝ տվյալ դեպքում ԱԳՆ-ի հետ նախնական քննարկման»,- ասել է Շեֆերը: Նրա խոսքով՝ նման համերգ կարող է տեղի ունենալ, բայց այժմ հարմար պահ չէ դրա համար:
Կարդացեք նաև
Պատրաստեց՝ Վիկտորյա ԱՆԴՐԵԱՍՅԱՆԸ
