«Սասնա ծռեր» հիմնադրամի հոգաբարձուների խորհրդի անդամ, երգահան Եղիշե Պետրոսյանն ահազանգում է, որ «Սասնա ծռերի»` անազատության մեջ գտնվող անդամներից մեկը 44 օր գտնվել է հացադուլի մեջ, նրա քաշը հասել է 30 կիլոգրամի և նրան որևէ իրավական աջակցություն չի ցուցաբերվել:
«Հայելի» ակումբում լրագրողները հետաքրքրվեցին` ո՞վ է եղել այդ անձնավորությունը, երգահանը պատասխանեց. «Հիմա փորձում ենք դա պարզել: Այդ ամենն այնքան էլ հեշտ չէ ճշտելը, քանի որ ընտանիքի անդամներին թույլ չեն տալիս հանդիպել նրանց հետ:
Պարոն Պետրոսյանը կոչ արեց օգնել հիմնադրամին, քանի որ «Սասնա ծռերի» ընտանիքների համար բարդ է վճարել ազատ արձակման համար պահանջվող գրավը` մեկ միլիոն դրամը. «Նրանց ընտանիքի անդամները չունեն այդ մեկ միլիոն դրամը: Պետության նշանակած գրավի չափն այնքան է, որ մեր մի քանի ամսվա հավաքածը միանգամից ի չիք են դարձնում»:
Նշենք, որ մինչ օրս գրավով բաց է թողնվել խմբի անդամներից Մարտին Վարդանյանը, սակայն նաև Սարո Այվազյանին ազատելու որոշում է կայացվել:
Կարդացեք նաև
Եղիշե Պետրոսյանը տեղեկացրեց, որ «Սասնա ծռեր» հիմնադրամը հոկտեմբերի 29-ին Խուլ ու համրերի միավորման մշակույթի տանը կկազմակերպի համերգ, որից գոյացած ողջ հասույթն ուղղվելու է «Սասնա ծռեր» խմբի բանտարկված անդամների անապահով ընտանիքներին: Համերգի ընթացքում առաջին անգամ կհնչի նաեւ Եղիշե Պետրոսյանի հեղինակած երգը՝ նվիրված ՊՊԾ գունդը գրաված Սասնա ծռերին հաց բերող Արթուր Սարգսյանին: Համերգին կմասնակցեն նաեւ Ռուբեն Հախվերդյանը, Սրբուհի Ստամբոլցյանը, «Խազեր» անսամբլը:
Հիմնադրամի հոգաբարձուների խորհրդի նախագահ Արմենակ Կյուրեղյանը մտահոգություն հատնեց, թե ներկայումս հիմնադրամի հաշվին այնքան գումար է, որը կբավականացնի միայն հարկային պարտավորությունների կատարմանը:
Եղիշե Պետրոսյանը հավելեց, որ «Սասնա ծռեր» հիմնադրամի պաշտոնական էջում կարելի է գտնել «Ամերիաբանկում» բացված հաշվեհամարը, որին կարելի է փոխանցել գումարը: Նա հորդորեց, որ եթե ամեն մեկը 1000 դրամ նվիրաբերի հիմնադրամին, «ոչ մեկի տնտեսությունը դրանից քարուքանդ չի լինի, բայց մենք բավական լուրջ օգնություն ցուցաբերած կլինենք»:
Aravot.am-ը Եղիշե Պետրոսյանի` «Սասնա ծռեր» խմբի` անազատության մեջ գտնվող անդամներից մեկի` 44 օր հացադուլի մեջ գտնվելու հայտարարության վերաբերյալ պարզաբանումներ ստացավ ՀՀ արդարադատության նախարարության քրեակատարողական վարչության հանրային կապերի բաժնի պետ Գոռ Ղլեչյանից: Նա մեզ հետ զրույցում պնդեց, թե այդ հայտարարությունները իրականությանը չեն համապատասխանում ու պատասխան հարցով դիմեց. «Նա անուն տվե՞լ է»:
Մեր այն հիշեցմանը, թե «Սասնա ծռեր» հիմնադրամն այժմ այդ անունը պարզելու փուլում է, քանի որ դա դժվար է, երբ հարազատներին թույլ չեն տալիս հանդիպել անազատության մեջ գտնվող անդամների հետ ու միևնույն ժամանակ հիշեցրինք, որ Եղիշե Պետրոսյանն ի լուր բոլորի է այդ հայտարարությունն արել, պարոն Ղլեչյանն էլ ասաց. «Ես էլ ի լուր բոլորի հայտարարում եմ, որ դա իրականությանը չի համապատասխանում: Ես չեմ մեկնաբանում իրենց ասածները»:
Տաթև ՀԱՐՈՒԹՅՈՒՆՅԱՆ
