Ռուսաստանի նկատմամբ հայ հասարակության դրական վերաբերմունքը և Ռուսաստանի՝ որպես գլխավոր գործընկերոջ ընկալումը 17%-ով նվազել է:
«Նովոստի–Արմենիա» մամուլի կենտրոնում հրավիրված ասուլիսին ռուս հրապարակախոս, Միջազգային իրավունքի ռուսական ասոցիացիայի անդամ Դենիս Դվորնիկովն այս ցուցանիշն աղետալի բնութագրեց:
Տեղեկացնենք, որ նման պատկեր ստացվել է Եվրասիական բանկի հետազոտական կենտրոնի կողմից անցկացված ուսումնասիրության արդյունքներով:
Սա պարոն Դվորնիկովը համարում է ռուսական դիվանագիտության հետևանք: Ըստ նրա` այս ցուցանիշի առնվազն 10 տոկոսի համար պատասխանատու է ՌԴ փոխվարչապետ Դմիտրի Ռոգոզինն իր հայտարարություններով. «Նա պետք է զգույշ լիներ այն ժամանակ, երբ ապրիլին հայտարարում էր, թե Ռուսաստանի կողմից Ադրբեջանին զենքի վաճառքն ինքը սովորական է համարում: Ցանկացած բարձրաստիճան պաշտոնյա պետք է գիտակցի, որ դա ցավոտ կետ է յուրաքանչյուր հայի, առավել ևս ԼՂՀ յուրաքանչյուր քաղաքացու համար: Եվ հենց ցավոտ կետերը «կոխրճելու» հասկացության բացակայությունն է ստեղծված իրավիճակի գլխավոր ախտանիշներից մեկը:»:
Ըստ Դենիս Դվորնիկովի` պատճառներից է նաև ռուս հասարակության` հայաստանյան իրողությունների ընկալման բացակայությունը` էմպատիայի բացակայությունը, այսինքն` դիմացինի զգացողությունը ընկալելու, կարեկցելու ունակությունը:
Կարդացեք նաև
Որպես ստեղծված իրավիճակի դրդապատճառ՝ ռուս հրապարակախոսը առանձնացրեց գործարար Լևոն Հայրապետյանի ձերբակալությունը, ազգությամբ հայ ՌԴ քաղաքացի Մարատ Ուելդանովի՝ Բաքվում ձերբակալությունը:
Տաթև ՀԱՐՈՒԹՅՈՒՆՅԱՆ
