«ՀՀ-ում երկար տարիներ իշխում է խորթ արժեհամակարգ: Քանի այն գործում է՝ ոչինչ չենք կարողանա բացահայտել, որովհետեւ դառնում ենք երկիրը բզկտող, իրար ոչնչացնող»,-Կոմիտասի անվան պանթեոնում Aravot.am-ի հետ զրույցում ասաց 1999 թվականի հոկտեմբերի 27-ի ահաբեկչության զոհը դարձած ԱԺ նախագահ Կարեն Դեմիրճյանի շիրիմին այցելած՝ «Ղարաբաղ» կոմիտեի անդամ Աշոտ Մանուչարյանը:
Նա ընդգծեց, որ ինքնությունը կորցրած եւ խեղճացած երկիրն անգամ չի ուզում «իմանալ»՝ արդյոք եղելությո՞ւն է «Հոկտեմբերի 27»-ի ողբերգության հետ կապված վարկածը. «Այդ ժամանակ արտաքին ուժերի կողմից որպես Ղարաբաղի խնդրի լուծում ՀՀ-ին պարտադրվում էր Մեղրիի փոխանակման տարբերակը. մենք հանձնում էինք Մեղրին, փոխարենը՝ ստանում Լաչինն ու Ղարաբաղը: Դա բերելու էր նրան, որ ՀՀ-Ղարաբաղ համակարգը հայտնվելու էր թուրքական «տոպրակում», եւ Հայաստանի կազմաքանդումը դառնում էր ժամանակի հարց: Այս բանին դեմ են եղել Կարեն Դեմիրճյանը եւ Վազգեն Սարգսյանը: Մեծ է հավանականությունը, որ եղածը կապված է դրա հետ»:
Հետաքրքրվեցինք՝ ինչո՞ւ «Հոկտեմբերի 27» տեսած հասարակության մի զգալի հատված հուլիսին սատարեց բռնի ուժով քաղաքական հարցեր լուծելու տարբերակը: «Բռնի ուժով քաղաքական հարցեր լուծելու մասին չէ խոսքը: Նման հարցերը լուծվել են մինչեւ հուլիսի դեպքերը, դրանից շատ առաջ եւ այսօր: Երբ իշխանությունը հանցագործություն է կատարում, ոտնահարում է բոլոր իրավունքները, դա չի նշանակում, թե վերջինիս կատարած բռնությունն օրինական է»:
Կարդացեք նաև
Լուիզա ՍՈՒՔԻԱՍՅԱՆ
