Այսօր խորհրդարանական հինգ խմբակցությունները` ՀՀԿ, ՀՅԴ, ՕԵԿ, ՀԱԿ, ԲՀԿ, ԱԺ-ում ստորագրեցին ՄԱԿ-ի զարգացման ծրագրին ուղղված նամակ: Նամակում խորհրդարանական խմբակցությունների ներկայացուցիչները ՄԱԿ-ին հորդորում են` դերակատարում ունենալ Ընտրական օրենսգրքի հետ կապված քաղաքական ուժերի համաձայնագրով նախատեսվող տեսախցիկների տեղադրման հարցում: Նախատեսվում է, որ բոլոր տեղամասերից պետք է ուղիղ հեռարձակում ապահովվի:
Հիշեցնենք, որ ԵՄ-ն երկու միլիոն եվրո էր խոստացել տրամադրել Հայաստանին այդ նպատակով: Հայ պատգամավորները կարծում են, որ ՄԱԿ-ն էլ պետք է իր աջակցությունը ցուցաբերի`առավելապես տեխնիկական: «Գլխավոր նպատակն այն է, որ լինի հանրային վերահսկողություն օրինականության նկատմամբ եւ բացառվեն խախտումները` ապօրինի քվեարկություններ, բռնություններ, քվեաթերթիկների հետ մանիպուլյացիաներ եւ այլն»,- նամակի ստորագրումից հետո լրագրողների հետ զրույցում ասաց ՀԱԿ խմբակցության ղեկավար Լեւոն Զուրաբյանը` հավելելով, որ ոչ ոք Քրեական օրենսգիրքն ուղիղ եթերում խախտելու ցանկություն չի ունենա:
ԲՀԿ խմբակցության ղեկավար Նաիրա Զոհրաբյանի խոսքով էլ, ՄԱԿ-ը, որպես բոլոր քաղաքական ուժերի կողմից առավել վստահություն ունեցող կառույց, պետք է ինքն իրականացնի տեսանկարահանման ողջ գործընթացը, որպեսզի այն չլինի իշխանության, ընդդիմության կամ որեւէ քաղաքական ուժի կազմակերպման խնդիրը` հետագայում շահարկումներից խուսափելու համար:
Նելլի ԳՐԻԳՈՐՅԱՆ
