Այսօր ԱԺ-ում արդարադատության փոխնախարար Սուրեն Քրմոյանը ներկայացրեց «Զբաղվածության մասին» օրենքում փոփոխությունների նախագիծը, որով նախատեսում են քրեակատարողական հիմնարկներում մասնագիտական կրթություն տալ դատապարտյալներին:
Նախագծի քննարկման ժամանակ ՕԵԿ պատգամավոր Հովհաննես Մարգարյանն ասաց, որ գողությունները շատ են տարածվել՝ սոցիալական վիճակից ելնելով: Նա հայտարարեց. «Անկախ նրանից՝ կրթություն ունի, չունի մարդը, եթե սոված է, գնում է այդ ճանապարհով: Գողանում է, որպեսզի իր կեցությունն ապահովի, իր երեխաներին կերակրի»:
Պատգամավորն ասաց, որ մարդիկ սոված են, գոմերում են ապրում, ծայրաստիճան վատ պայմաններում, ուստի առաջարկեց նախ աշխատատեղ ստեղծել, նոր դատապարտյալների մասնագիտական կրթության հարցը լուծել:
Մարդը կամ դիմում է ինքնասպանության, երբ հնարավորություն չունի ապրելու, կամ գնում է գողության. «Եթե սոված է, էլի գողանալու է: Հարցը մենք պետք է լուծենք հիմքից»:
Կարդացեք նաև
ՀԱԿ պատգամավոր Գագիկ Ջհանգիրյանն արձագանքեց Հովհաննես Մարգարյանին՝ հակադարձելով. «Մեր գործընկերը գողությունը որպես հափշտակության տեսակ, բերեց կապեց աղքատության հետ: Քրեական իրավունքի սոցիոլոգիայում կատարված հարյուրավոր ուսումնասիրություններ ապացուցում են հակառակը: Ոչ թե հափշտակություններ, գողություններ կատարողները հիմնականում աղքատ մարդիկ են, ո՛չ, լավ էլ նյութապես ապահովված են, ունեւոր ընտանիքների զավակներ ու անդամներ են: Մենք հիմա վիրավորում ենք աղքատին, ասում ենք՝ աղքատ մարդը պոտենցիալ գողություն կատարող է»:
Նա վստահեցրեց, որ աղքատ մարդն ավելի սկզբունքային, ավելի հպարտ, ավելի բարոյական մարդ է. «Չի քծնել, չի շողոքորթել, չի դավաճանել իր սկզբունքներին, դրա համար էլ աղքատ է մնացել: Աղքատը գնում է՝ բեռ է կրում, կայարանում բեռ է թափում, մի քանի հազար դրամ է աշխատում, բերում իր երեխային կերակրում է: Ես սա գիտական սոցիոլոգիայի արդյունք եմ ձեզ ասում: Հանկարծ չմտածենք, որ հափշտակություն, գողություն կատարողն անպայման չունեւոր մարդն է, ո՛չ: Նարկոման է, լավ էլ հարուստ մարդու տղա է, գնում է նարկոտիկի փող հայթայթի, որովհետեւ հայրը չի տալիս: Հարյուրավոր օրինակներ կարող եմ ձեզ ասել ներկա պաշտոնատար անձանց զավակների մասին, ինչի՞ եք աղքատի հետ կապում»:
Հռիփսիմե ՋԵԲԵՋՅԱՆ
