Լուսանկարներում ներկայացված օպտիկական սարքերն ու նշանոցները նախատեսված են հրետանու, զրահատանկային սպառազինության համար, եւ ամբողջությամբ արտադրվում են Հայաստանում:
Իսկ շարժական զրահապատ նպատակակետերի, ինչպես նաև թեթև դաշտային կառույցների ու կրակակետերի խոցման համար նախատեսված «Ֆագոտների» համար արտադրվող ջերմատեսիլ սարքի (գլխավոր լուսանկարում) առանձնահատկությունն այն է, որ սարքը միաժամանակ նաեւ նշանառու է: «Այն հայտնաբերում է ոչ տեսանելի պայմաններում, այսինքն՝ ջերմությամբ է «զգում» եւ էկրանին ցույց տալիս: Իսկ նշանոցը ծառայում է «Ֆագոտ»-կայանքից նշանակետը խոցելու համար»,-Aravot.am-ին պատմում է հայաստանյան արտադրող ընկերության տնօրեն Տիգրան Չիֆլիկյանը:
«Այս արտադրանքը սպառում է ՀՀ զինված ուժերը, բայց Ռուսաստանի հետ էլ ենք գործակցում, վերջինս որոշակի խմբաքանակ է գնում»,-ասում է նա:
Կարդացեք նաև
Մեր զրուցակիցն անդրադառնում է նաեւ ապրիլյան պատերազմից հետո սփյուռքից հայկական բանակին ուղարկված տարբեր տեսակի, այդ թվում՝ ջերմատեսիլ սարքերին. «Ճիշտ է, բանակը շատ շնորհակալ է դրանց համար, բայց զինվորական տեսանկյունից դրանք համապատասխան չեն, քանի որ պահանջներն այլ են՝ ամրություն, տեխնիկական տվյալներ, եղանակային պայմաններ…իսկ մեր արտադրանքի պարագայում տեխնիկական պահանջները հաշվի են առնվում»:
Հավելենք, որ վերոնշյալ սարքավորումները ցուցադրվել են Սպառազինությունների և պաշտպանական տեխնոլոգիաների «ArmHiTec-2016» առաջին միջազգային ցուցահանդեսում:
Լուիզա ՍՈՒՔԻԱՍՅԱՆ
