Մամուլի ազգային ակումբը «Հրատապ թեմա» ծրագրի շրջանակներում հոկտեմբերի 25-ին հյուրընկալել էր սփյուռքահայ լրատվամիջոցների խմբագիրների: Միջոցառմանը մասնակցում էին նաեւ ՀՀ սփյուռքի նախարարության ներկայացուցիչներ:
Սփյուռքի նախարարության Տեղեկատվության և հեռահաղորդակցության վարչության պետ Վաղինակ Վարդանյանը կարեւորեց համահայկական միասնական տեղեկատվական դաշտի և Սփյուռքի մասնագիտական ցանցերի ստեղծումը: Խոսելով Լրագրողների համահայկական համաժողովներից, ասաց, որ դրանք հրավիրվում են երկու տարին մեկ անգամ պարբերականությամբ: Նրա խոսքով՝ այս տարի համաժողովին մասնակցել է 140 լրագրող-խմբագիր, որից 92-ը՝ Սփյուռքից:
Մոսկվայի «Ժամ» պարբերականի հիմնադիր, գլխավոր խմբագիր և հրատարակիչ Աննա Գիվարգիզյանը ներկայացնելով իր պարբերականը՝ ասաց, որ այն հրատարակվում է 2008-ից` 11500 տպաքանակով, եւ Սփյուռքով հրատարակվող ամենամեծ տպաքանակով լրատվամիջոցն է: «Ժամը» տարածվում է նաեւ եվրոպական 8 երկրներում:
Կարդացեք նաև
Գլխավոր խմբագիրը փաստեց, որ Մոսկվայի «Ժամ» պարբերականին բաժին են ընկել նույն խնդիրները, ինչ բոլոր անկախ տպագիր ԶԼՄ-ներին:
Արդեն 25 տարի Ժնեւի «Արձագանք» հանդեսի գլխավոր խմբագիրը հանդիսացող Մարալ Սիմսարը տեղեկացրեց, որ «Արձագանքը» 30 տարեկան է, աշխատում է կամավորական սկզբունքով, իրեն աջակցում են ընտանիքի անդամները: Նյութերը հիմնականում ֆրանսերեն են՝ նկատի ունենալով լսարանի ֆրանսախոս լինելը: Ունեն որոշ գովազդատուներ, բայց դրանից ուղղվող գումարով հանդեսի ծախսերը չեն փակվում: Տիկին Մարալը փաստեց, որ նաեւ մարդուժի պակաս ունեն: Նրա ձեւակերպմամբ, նաեւ դժվար է միայն ամսագրի ներկայացուցիչների ուժերով թուրքական եւ ադրբեջանական ավերիչ ապատեղեկատվության եւ հակահայկական քարոզչության դեմ պայքարելը:
Սիդնեյի հայկական հեռուստատեսության հիմնադիր Սարգիս Յեդելյանը պատմեց, որ հեռուստատեսությունը ստեղծել է 1994-ին: Նա ցավով փաստեց, որ դեցիմետրային ալիքն այս տարվա սկզբին պետության կողմից վաճառվել է: Ներկայումս գործում է «Արմենիա» կուսակցական շաբաթաթերթը, կան 2 ամենօրյա եւ մի քանի շաբաթօրյա վարժարաններ:
Հիմնադրի խոսքով, ավստրալահայերի թիվը 40000 է, սակայն ակտիվ համայնքային կյանքով է ապրում 3000-4000-ը:
Գոհար ՀԱԿՈԲՅԱՆ
