Արձագանքելով վարչապետ Կարեն Կարապետյանի հայտնի հարցազրույցին, որը տեղի ունեցավ հոկտեմբերի 22-ին, մի քանի լրատվամիջոցների ներկայացուցիչների մասնակցությամբ, որտեղ վարչապետը նշել էր, թե ցանկացած ոք կարող է անխոչընդոտ ապրանք ներկրել, իսկ եթե լինեն խոչընդոտողներ, անձամբ իրեն զանգեն, ՓՄՁ համագործակցության ասոցիացիայի ղեկավար Հակոբ Ավագյանը նկատեց. «Չեմ ուզում տեսնել վարչապետ, որը բիզնես -օմբուդսմենի դերակատարում է ստանձնում»:
Այսօր «Մեդիա կենտրոնում» պարոն Հակոբյանն ասաց. «Վերջապես պետք է կարողանանք ստեղծել ինստիտուտ որպես այդպիսին, այլ ոչ թե անձնավորված վարչապետ, որը ավելի հասանելի է հեռախոսին»:
Ըստ պարոն Ավագյանի, ծրագրում արդեն կա գործարար շահի հաշտարարի վերաբերյալ դրույթ: Ծրագրում ընդգրկված այն կետը, թե 2017-ին կառավարությունը կփորձի վերլուծություն անել եւ 2018-ին ներդնել, այնպիսի մեխանիզմներ, որոնք կաջակցեն փոքր ու միջին բիզնեսին, ըստ Հակոբ Ավագյանի, սա խոսում է այն մասին, որ այդպես էլ չենք կարողացել ապահովել հանձնում-ընդունումը նախորդ կառավարությանը:
«Մասնավորապես այդ հարցի շուրջ Եվրոպական բանկի փորձագետների բազմաթիվ վերլուծություններ կան: Դա այն ինստիտուտն է, որը պետք է գնահատի՝ լավ է աշխատում, թե ոչ, այլ ոչ թե զանգել վարչապետին, ասել՝ չի աշխատում»:
Կարդացեք նաև
ՓՄՁ ներկայացուցիչը նոր ծրագրով կադրային փոփոխություններ էր ակնկալում, հատկապես մաքսային ոլորտում, քանի որ պարոն Հակոբյանի համոզմամբ, համակարգում աշխատող մաքսավորը սովոր էր այն կանոններով աշխատելուն եւ չի կարող ապրել ցածր աշխատավարձով:
Ասուլիսի մեկ այլ մասնակից՝ տնտեսագետ Աշոտ Խուրշուդյանին զարմացրել եւ ուրախացրել է, որ այս նոր կառավարության հետ «մեծ հույսեր կապվեցին»: «Այս կառավարության օրոք մարդիկ նույնիսկ անձնական նամակներ, խնդրանքներ են գրում վարչապետին, ինչը նշանակում է, որ հասարակությունում էական արձագանք տվեցին այն կադրային փոփոխությունները, որոնք տեղի ունեցան: Եթե նախկինում վարչապետ, նախարար պաշտոնն ընկալվում էր որպես իշխանություն, այսինքն` նվեր, որպես լիազորություն ավելի շատ, այս կառավարությունն ավելի շատ ընկալվեց, որ պատասխանատվություն է ստանձնել ինչ -որ բան անելու»:
Պարոն Խուրշուդյանի համար, սակայն, ընդունելի չէ, որ ծրագրում նշված հիմնական գործիքը սուբսիդիան է. «Այնքան սուբսիդիա կա այս տեքստում, որ մարդ իրոք վախենում է: Սուբսիդիան հարկատուների հաշվին է»:
Տնտեսագետ Թաթուլ Մանասերյանի կարծիքով էլ, որը նույնպես մասնակցում էր «Մեդիա կենտրոնի» քննարկմանը, ժամանակն է հրաժարվել փոքր ու միջին բիզնես տերմինից եւ օգտագործել «միկրո եւ փոքր բիզնես»: Ըստ նրա, Հայաստանն առաջին հերթին այս խնդիրն ունի լուծելու: Թաթուլ Մանասերյանի խոսքերով, խոշոր եւ միջին բիզնեսն էլ ունի խնդիրներ, բայց նրանք որոշ չափով կայացած են:
Նա դրական համարեց, որ կառավարության ծրագրի մշակման եւ ներկայացման փուլում նոր մշակույթ է ձեւավորվել` քաղհասարակության մասնագիտացված շերտին մասնակից դարձնելու, որոշումներ կայացնելու փուլում: Նա միանգամայն իրատեսական է համարում, որ վեց ամսում ծրագիրը կիրականացվի եւ համամիտ է Հակոբ Ավագյանի այն մտքին, որ նախկին կառավարություններից ընդունում-հանձնում պետք է տեղի ունենա:
Լուսինե ԲՈՒԴԱՂՅԱՆ
Լուսանկարը՝ «Մեդիա կենտրոնի»
