«Խոսում ենք համապարփակ լուծման մասին: Դա բոլոր այն տարրերն են, որոնք պետք է լինեն բանակցային սեղանին: Չենք կարող ընտրել մի խնդիր եւ դա դիտարկել համատեքստից դուրս: Եթե շրջակա տարածքների վերադարձման խնդիր կա, անկեղծ քննարկում պետք է լինի ԼՂ կարգավիճակի մասին: Շիտակ պետք է խոսենք նաեւ փախստականների, ներքին տեղահանվածների մասին»,-այսօր լրագրողների հետ հանդիպման ժամանակ ԵԱՀԿ Մինսկի խմբի համանախագահներից Ջեյմս Ուորլիքն (ԱՄՆ) Արցախյան հակամարտության կարգավորման բանակցությունների առնչությամբ այսպիսի տեղեկություններ հայտնեց:
Նա նշեց, որ հիշատակված տարրերը հանդիսանում են հակամարտության համապարփակ լուծման բաղադրիչներ. «Կողմերից ոչ մեկ չի կարող ընտրել մեկ տարր: Սա փաթեթ է»:
Անդրադառնալով ապրիլյան քառօրյա ռազմական գործողություններին՝ Ջեյմս Ուորլիքն ասաց. «Ականատես եղանք իրական ողբերգության, որը շատ կյանքեր խլեց: Այն ցույց է տալիս, որ խաղաղ կարգավորմանն ուղղված բանակցությունը մեծ նշանակություն ունի: Շփման գծում համեմատաբար հանգիստ իրավիճակ է, բայց անգամ մեկ զոհը չափից շատ է: Իրավիճակն, ընդհանուր առմամբ, հանգիստ է եղել, եւ դա հիմք է այն բանակցությունների, որոնց ցանկանում ենք ձեռնամուխ լինել»:
Ուորլիքի ձեւակերպմամբ՝ բանակցային գործընթացում «կան տարաձայնություններ եւ որոշակի ոլորտներ, որոնք քննարկման կարիք ունեն, բայց երկու նախագահներն էլ համաձայն են առաջ ընթանալ խնդրի խաղաղ կարգավորման ճանապարհով»:
Կարդացեք նաև
Լուիզա ՍՈՒՔԻԱՍՅԱՆ
