«Նա շատ հետաքրքիր տեղեկություն հայտնեց՝ գործով առանցքային վկայի՝ Աննա Միսակյանի վերաբերյալ: Այն է՝ Աննա Միսակյանը պարբերաբար եղել է Անի Մաջնունյանի տանը, նույնիսկ այն աստիճանի, որ Անի Մաջնունյանն իր կերակուրը պատրաստելու համար Աննային ուղարկել է խանութ»,-Aravot.am-ի հետ զրույցում ասաց հիրոմանտ, էքստրասենս Անի Մաջնունյանի սպանության մեջ մեղադրվող Մուշեղ Մխիթարյանի պաշտպան Մարինե Ֆարմանյանը:
Նշյալ տեղեկությունն այսօր դատարանին հայտնել էր Անի Մաջնունյանի մայրը՝ Լորետա Գյուլումյանը, որի հարցաքննությունն ընդհատվեց՝ ինքնազգացողությունը վատանալու պատճառով: Նա նշել էր, որ մի անգամ դստեր հետ խոսելիս հարցրել է՝ հաց կերե՞լ է: Անի Մաջնունյանն էլ պատասխանել է, որ ոչ, բայց հիմա Աննային այդ նպատակով կուղարկի խանութ:
Այս տեղեկությունը նորություն էր դատավարության կողմերի համար: Նախկինում նրանք ոչ մի վկայից չէին լսել, որ գործով վկա Աննա Միսակյանը մինչեւ Մաջնունյանի սպանությունը եղել է վերջինիս տանը:
Ի դեպ, մեղադրյալ Մուշեղ Մխիթարյանն այսօրվա նիստին եկել էր ձեռնափայտով: «Ասաց, որ ոտքի նյարդն է ձգվում, նեւրոզ ունի: Նախկինում խնդիրներ ունեցել է, թոքի հիվանդություն է տարել»,-տեղեկացրեց փաստաբանը:
Կարդացեք նաև
Այլ մանրամասները՝ տեսանյութում:
Լուիզա ՍՈՒՔԻԱՍՅԱՆ
