Հոկտեմբերի 20-22-ը ԵՊՀ ուսանողներն ու պրոֆեսորադասախոսական կազմն Արցախում էին: Այցի նպատակը Դուշման Վարդանի 50 ամյակին նվիրված միջոցառումներն էին: Ծրագրի ընթացքում նախատեսված էր Դուշման Վարդանի անվան դասասենյակի բացում, հերոսի 50 ամյակին նվիրված հուշ-ցերեկույթ, հանդիպում ԼՂՀ նախագահ Բակո Սահակյանի հետ:
Այցի առաջին օրը համալսարանականները եղան նախագահի նստավայրում: Հանդիպման ընթացքում քննարկվեց համալսարանականների կողմից իրականացվող և արդեն կայացած ծրագրերը, այդ թվում՝ հանդիպումը ապրիլյան պատերազմի մասնակիցների հետ, ռազմական բանակումը: Ուսանողների հետ հարց-պատասխանի ժամանակ նախագահը անդրադարձավ Արցախում առկա խնդիրներին և երկրի զարգացման հեռանկարներին: Նախագահը շնորհակալություն հայտնեց մայր բուհին՝ մշտապես Արցախ կատարվող այցերի և Արցախ-բուհ-բանակ եռակողմ կապի պահպանման համար:
Երկրորդ օրը համալսարանականները մասնակցեցին Շուշիի Խաչատուր Աբովյանի անվան դպրոցում Դուշման Վարդանի անվան դասասենյակի բացմանը: Բացմանը ներկա էր նաև ԼՂՀ նախագահ Բակո Սահակյանը, Դուշման Վարդանի մայրը, քույրը: Կարմիր ժապավենը կտրեցին ՀՀ և ԼՂՀ «Արիության» մեդալակիր Գոռ Դարմանյանը, Ապրիլյան պատերազմի մասնակիցներ, «Մարտական խաչ» շքանշանի ասպետներ Շուլի Հակոբյանն ու Գևորգ Մանուկյանը: Մերօրյա հերոսները նշեցին, որ դասասենյակի բացումը իրենց վստահելը շատ մեծ պատիվ է և, որ իրենք փորձել են լինել Դուշմանի գործի շարունակողը: Դասասենյակում այսուհետ կլինեն ԵՊՀ-ի կողմից դպրոցին նվիրաբերած համակարգիչներն ու ԵՊՀ հրատարակչության տպագրած գրքերը: Նախագահ Բակո Սահակյանը շրջեց դասասենյակում, ծանոթացավ գրքերին: Նա նշեց, որ այս գրքերը շատ կօգնեն աշակերտներին:
Դուշման Վարդանի մայրը՝ տիկին Զարիկը, նշեց, որ իր որդու պատգամն է կրթել հայրենասեր սերունդ: Նա և իր ընտանիքը Վարդանի թանգարանում, հիմա արդեն նաև այս դասասենյակում են պատրաստվում կատարել հերոսի պատգամը: Դուշման Վարդանի քույրն էլ խոստացավ, որ հաճախ կայցելի այս դպրոց:
Բացման արարողությանը հաջորդեց դպրոցի դահլիճում կազմակերպված հուշ-ցերեկույթը: Համալսարանականները ներկայացան երգերով, ասմունքով ու պարերով:
Օրվա ավարտին համալսարանականները եղան Ստեփանակերտում գործող ԹՈՒՄՈ կենտրոնում: Հանդիպեցին ԹՈւՄՈ-ի ղեկավարին և ուսանողներին։ Շրջեցին ԹՈՒՄՈ-յի դասասենյակներով: Ծանոթացան այնտեղ իրականացվող ծրագրերին և նախագծերին։ Այստեղ ևս նշեցին, որ ուրախ են ընդունելու ԵՊՀ-ականներին:
Արցախ կատարած այցի վերջին՝ երրորդ օրը նախատեսվածի պես տեղի ունեցավ Դուշման Վարդանի հիշատակի պուրակի ստեղծումը՝ Շուշի-Բերձոր ճանապարհին: Միջոցառումների կազմակերպիչ, ԵՊՀ ուսանողների հետ տարվող աշխատանքների կենտրոնի տնօրեն Վահագն Վարագյանի խոսքով այս միջոցառումներով ևս մեկ անգամ արժևորում ենք այն հերոսների հիշատակը, ովքեր իրենց կյանքի գնով մեզ պարգևեցին Արցախի ազատությունն ու անկախությունը:
Արցախ մեկնած պատվիրակության կազմում էին պրոռեկտոր Ռուբեն Մարկոսյանը, Ուսանողների հետ տարվող աշխատանքների կենտրոնի տնօրեն Վահագն Վարագյանը, Արհեստակցական կազմակերպության նախագահ Արմեն Ավետիսյանը, Ուսանողական խորհրդի նախագահ Ռաֆֆի Քարամյանը, ԵՊՀ մարտական պատրաստության ակումբի նախագահ Արմեն Խաչիկյանը, որոշ ֆակուլտետների դեկաններ, ստորաբաժանումների ղեկավարներ և ուսանողներ, որոնց թվում՝ ապրիլյան քառօրյա պատերազմի ժամանակ մարտական սխրանքով աչքի ընկած և ամռանը զորացրված ուսանողներ:
Մամլո հաղորդագրություն
