«ԵՄ-ն բիզնեսի համար» խորագրով միջոցառումների մեկնարկին այսօր Հայաստանում ԵՄ պատվիրակության ղեկավար Պյոտր Սվիտալսկին լրագրողների հետ հանդիպման ժամանակ ասաց, որ ԵՄ-ն պատրաստ է օժանդակել Հայաստանի կառավարությանը: Ըստ պարոն Սվիտալսկու.«Մենք հավատացած ենք, որ տնտեսական ճկունությունը շատ կարեւոր է թե՛ մեզ համար, թե՛ Հայաստանի պես երկրների, եւ մենք հատուկ ուշադրություն ենք դարձնում տնտեսական զարգացման աջակցությանն ու համագործակցության լավագույն հնարավորությունների տրամադրմանը ինչպես տարածաշրջանում, այնպես էլ ԵՄ-ում»:
Պարոն Սվիտալսկու խոսքերով՝ հիմնական գործիքը ՓՄՁ-ին աջակցությունն է, մեծ ու չիրացված ներուժ կա Հայաստանում ՓՄՁ-ների համար. «Հայաստանում ՓՄՁ-ին բաժին է ընկնում զբաղվածության ընդամենը 30%-ը, այն դեպքում, երբ ԵՄ-ում ՓՄՁ զբաղվածությունը ՀՆԱ-ի մոտ 70% է: Մենք լիահույս ենք, ՓՄՁ շեշտադրումը նոր տնտեսական աճ կապահովի այս երկրի համար: Հավատացած ենք՝ օտարերկրյա ներդրողները, շրջանակային համաձայնագիրը, բարեփոխումները կօգնեն լրացուցիչ միջոցներ ներգրավել, այդ թվում նաեւ ԵՄ-ից: ԵՄ-ն պատրաստ է աջակցել ՀՀ կառավարությանը»:
Ասուլիսին ներկա ՀՀ տնտեսական զարգացման եւ ներդրումների փոխնախարար Գարեգին Մելքոնյանն էլ նշեց, որ մրցունակ եւ արդյունավետ փոքր ու միջին ձեռնարկությունների գործունեությունը մեր երկրի տնտեսական զարգացման կարեւորագույն նախապայմաններից է»:
Լրագրողներից մեկի հարցն՝ ինչպես են գնահատում ՀՀ- ԵՄ նոր շրջանակային համաձայնագրի ընթացքն ու արդյունքները, պարոն Մելքոնյանն այսպես պատասխանեց՝ «Այս օրերին մենք Երեւանում կազմակերպում ենք առեւտուր-ներդրումներ մասի 4-րդ բանակցային ռաունդը: Ինչպե՞ս եմ գնահատում՝ դրական եւ կառուցողական: Վերջին շրջանում շատ քննարկումներում եկել ենք ընդհանուր համաձայնության: Դեռեւս կան հարցեր, որոնք նեղ մասնագիտական են: Քննարկումները շարունակվում են, ունենք զգայուն հարցեր թե Հայաստանի եւ թե ԵՄ-ի համար: Հնարավոր է գտնել երկու կողմերի համար ընդունելի լուծումներ քննարկումների ժամանակ: Մենք քննարկում ենք ապրանքների առեւտուրը, մաքսային հարցեր՝ ներառյալ մաքսային հարցերում փոխադարձ վարչարարական աջակցության մասին գործընթացները, առեւտրի տեխնիկական խոչընդոտներ»:
Կարդացեք նաև
Մանրամասն՝ տեսանյութում
Պյոտր Սվիտալսկին էլ հարցի առնչությամբ ասաց, որ շրջանակային համաձայնագրի լիագումար համագումարը վաղը կլինի, այժմ կենտրոնացած են առեւտրի եւ ներդրումների վրա. «Համաձայնագրի քաղաքական գլուխները մեծապես բանակցվել էին, առաջընթացը զգալի է եղել: Այժմ ուշադրությունը առեւտրին եւ ներդրումներին է ուղղված»:
Նելլի ԲԱԲԱՅԱՆ
