ՆԳ նախկին նախարար Վանո Սիրադեղյանի գործով ցմահ ազատազրկման դատապարտված Արմեն Տեր-Սահակյանին արդարադատության նախարարության «Նուբարաշեն» քրեակատարողական հիմնարկի վարչական հանձնաժողովը տվել էր իր որոշումը նրա վաղաժամկետ պայմանական ազատման դիմումի հետ կապված: Ըստ այդ որոշման, ճիշտ է, ցմահ ազատազրկվածի մոտ առկա են դրական տեղաշարժեր, նա չունի ոչ մի տույժ, կարգապահական որեւէ խախտում չի կատարել, բայց մեկ տարով հետաձգվում է նրա պահանջի քննարկումը:
Էրեբունի եւ Նուբարաշեն վարչական շրջանների ընդհանուր իրավասության դատարանի դատավոր Արտուշ Գաբրիելյանն այսօր ընդամենը տաս րոպե մնաց խորհրդակցական սենյակում, մերժելով դատապարտյալի բողոքը քրեակատարողական հիմնարկի եւ վերահսկող դատախազի դեմ:
Ա. Տեր-Սահակյանը Aravot.am-ի հարցին, թե բողոքարկելո՞ւ է, ասաց՝անպայման,
«Չնայած գիտեմ` նույնն է լինելու, մեր արդարադատությունը թեք է կանգնած, չէ՞, պարոն դատախազ», ինչին հետեւեց դատախազ Հարությունյանի պատասխանը. «Շատ ուղիղ է»:
Կարդացեք նաև
Մինչ դատավորը կգնար որոշում կայացնելու, իր խոսքում ցմահ ազատազրկվածն ասաց. «Մեր վախտ հարգանք կար, կոմունիստների ժամանակ զսպվածություն կար, հիմա բեսպրեդել է, հիմա Եվրոպայից Եվրոպա այլասերված է»:
Դատավորը հորդորեց խոսել բողոքից:
Ա. Տեր-Սահակյանն ասաց, թե 20 տարվա ընթացքում որեւէ աշխատանք, եթե քրեակատարողական հիմնարկը չի կատարել,1 տարի հետո ինչ աշխատանք պիտի տարվի, այսպես անվերջ: Նա կրկին բարձրաձայնեց ցմահների իրավունքների մասին, ասաց, թե պիտի պետությունը ցույց տա, որ կալանավոր, եթե նստում ես այսպես, խրախուսվում ես, վաղաժամկետ էլ պիտի լինի, շարժ պիտի լինի:
Նա ասաց, թե ՔԿՀ ներկայացուցիչ Արմեն Պետրոսյանի դեմ ոչինչ չունի ասելու, նրան ինչ ասում են, նա այդ էլ անում է, սակայն երբ դատարանը իր որոշումը հրապարակեց, Արմեն Տեր Սահակյանն ասաց, թե փաստորեն վարչակազմը ավելի հզոր դուրս եկավ, քան դատախազությունը, մինչդեռ հակառակը պետք է լիներ:
Մեր տեղեկություններով, այս պահին ցմահ ազատազրկվածներից քսաներկուսը քսան եւ ավելի տարի գտնվում են «Նուբարաշեն» քրեակատարողական հիմնարկում:
Ռուզան ՄԻՆԱՍՅԱՆ
