Այսօր ԱԺ-ում քննարկվեց Փրկարարական ծառայության կանոնագիրքը հաստատելու մասին հարցը: Այս նախագծով նախատեսվում է, որ փրկարար ծառայության աշխատողները նույնպես կարող են զենք կրել՝ ԶՈՒ կայազորային եւ պահակային ծառայությունները հաստատելու մասին ՀՀ օրենքով սահմանված կարգով:
ՀՀ Փրկարարական կանոնագրքում նոր հոդվածներ են ավելացել: ԱԻՆ փոխնախարար Հայկարամ Մխիթարյանը նախագիծը ներկայացնելիս ասաց, որ փոփոխությունները կարգավորում են զենքի կրման կանոնները: Ամրագրվել է տարածքային պաշտպանությանը մասնակցելու, մարտական առաջադրանքներ կատարելու իրավասությունները, իրավունքները, պարտականությունները, ծառայողական զենք կրելու, ֆիզիկական ուժ կիրառելու իրավունքներն ու պարտականությունները եւ այլն:
Ըստ այդմ, սահմանվել է, որ ծառայողները ծառայողական պարտականությունները կատարելիս, նաեւ անհրաժեշտության դեպքում ծառայությունից դուրս ժամանակ ունեն զենք կրելու, գործադրելու իրավունք: Զենքը օգտագործելու իրավունքը տալիս է լիազոր մարմինը:
Ինչ վերաբերում է ֆիզիկական ուժ գործադրելուն, նշվում է, որ հանցագործություններ կանխելիս իր իրավասությունների շրջանակում ծառայողն իրավունք ունի ֆիզիկական ուժ գործադրել, եթե այլ ելք չկա: Նախագծով սահմանվում է նաեւ, որ ռազմական դրության, արտակարգ իրավիճակների պայմաններում համապատասխան լիազոր մարմնի սահմանած պահանջները վարորդի կողմից չկատարելու դեպքում տրանսպորտային միջոցը կանգնեցնելիս նույնպես կարող են դիմել զենքի օգնությանը: Զենքը կիրառվում է, եթե կանգնի՛ր արձագանքից եւ օդ կրակելուց հետո կարգազանցները չեն ենթարկվում: Առանց նախազգուշացման զենք կարող են օգտագործել հանկարծակի հարձակումների դեպքում, թռչող սարքերի առկայության եւ այլ դեպքերում:
Կարդացեք նաև
Ծառայողին արգելվում է զենք կիրառել հղիության ակնհայտ նշաններ ունեցող կանանց, հաշմանդամություն ունեցողների եւ անչափահաս երեխաների նկատմամբ՝ բացառությամբ նրանց կողմից քաղաքացիների կյանքին վտանգ սպառնացող զինված կամ խմբակային հարձակման դեպքերի:
Զենք կրելու իրավունքը վերաբերում է միայն այն ստորաբաժանումների աշխատակիցներին, որոնք գտնվում են սահմանամերձ գոտում՝ Տավուշի մարզում, որոնք պետք է զենք կրեն եւ պահպանեն ջրամբարները, հատուկ ենթակառուցվածքները:
Վահան Բաբայանը հետաքրքրվեց՝ նախագծում նշված է, որ ծառայությունից դուրս էլ փրկարար ծառայողներն իրավունք ունեն զենք կրել եւ անհրաժեշտության դեպքում օգտագործել, անհրաժեշտության դեպքը ո՞րն է, ինչպե՞ս եք մեկնաբանում: Փոխնախարարը պատասխանեց, որ եթե Տավուշի մարզում ծառայության են գործուղվում Երեւանից, նրանք զենքը ստանում են Երեւանի զինապահեստից, որտեղ ստորագրում են եւ իրենց քարտն են թողնում: Ծառայությունից հետո՝ մարզից վերադառնալիս իրենց մոտ է մնում զենքը, ճանապարհին գիշերում են: Այդ ընթացքում երբ զինված հարձակում լինի, նրանք իրավունք ունեն զենքն օգտագործել՝ ծառայությունից դուրս:
Վահան Բաբայանը նաեւ հարցրեց՝ օտար երկրների փրկարար ծառայողներն ունե՞ն իրավունք ՀՀ տարածքում զենք կրելու եւ օգտագործելու: Հայկարամ Մխիթարյանը պատասխանեց, որ ըստ պայմանագրի, կարող են եւ ՀՀ-ից զենքով գնալ այլ երկրներ եւ դրսից կարող են գալ:
Հռիփսիմե ՋԵԲԵՋՅԱՆ
