Այսօր ԱԺ նիստում ՀԱԿ խմբակցության ղեկավար Լեւոն Զուրաբյանը հայտարարեց, որ լայն սպառման ապրանքների շուկաներում մենաշնորհները ՀՀ-ում դարձել են ամենամեծ կոռուպցիոն չարիքը, որի պատճառով տուժում են սոցիալապես անապահով մարդիկ, թոշակառուները, տուժում է բիզնեսը. «Նոր վարչապետը հայտարարում է, որ այսուհետեւ բոլորը կարող են զբաղվել ներկրմամբ՝ առանց խոչընդոտների: Իսկ եթե խոչընդոտներ լինեն, առաջարկել է Պետրոս Ղազարյանին զանգահարել իր հեռախոսին եւ խոչընդոտների մասին հայտնել: Կարծում եմ, դա հարցի լուծման մեխանիզմ չէ»:
Նա առաջարկեց Գալուստ Սահակյանին, որ ԱԺ լսումներ հրավիրեն եւ լուրջ քննարկման առարկա դարձնեն այդ հարցերը, որ հասկանան՝ ինչ է կատարվում մենաշնորհների ոլորտում, ինչ միջոցառումներ պետք է կատարել, որ ապօրինի մենաշնորհները վերացվեն:
Գալուստ Սահակյանը պատասխանեց. «Իհարկե, միշտ էլ կարող ենք լսումներ անցկացնել: Համենայնդեպս, փաստեր են պետք, առավել եւս, եթե վարչապետը խոսել է, առաջիկայում իր բանաձեւը կներկայացնի»: Գալուստ Սահակյանը վստահեցրեց, որ բավականին լուրջ եւ մեծ կառույց կա դրանով զբաղվող: Նա ասաց, որ պետք է սպասել, տեսնել կառավարությունն ինչ է անում:
Կարդացեք նաև
Ժառանգության պատգամավոր Զարուհի Փոստանջյանն էլ հիշեցրեց քառօրյա պատերազմի մասին՝ ասելով, որ ԱԺ-ն այդպես էլ քննարկման առարկա չդարձրեց, թե ովքեր էին մեղավորները, որ մենք ունեցանք այդպիսի կորուստներ. «Ժամանակն է, որպեսզի ԱԺ-ն նաեւ հանձնաժողովների միջոցով քննության առարկա դարձնի մեր կորուստների վերաբերյալ իրողությունը, եւ մենք կարողանանք պատասխանատվության կանչել մեղավորներին: Մենք այս 25 տարվա մեջ առաջին անգամ ունեցանք տարածքային կորուստներ»:
Նա հորդորեց նախաձեռնել նիստ, որ քննարկման առարկա դարձնեն այս խնդիրը: Գալուստ Սահակյանը պատասխանեց, որ այդ խնդիրը հանձնաժողովներում քննարկվել է:
Հռիփսիմե ՋԵԲԵՋՅԱՆ
