Տաշքենդում ընդունվել է մի փաստաթուղթ, որը դատապարտում է Ադրբեջանի դեմ Հայաստանի ագրեսիան: Ինչպես ձեւակերպում է հոկտեմբերի 19 – ին «Ազերթաջի» գերմաներեն տարբերակը, Իսլամական համագործակցություն կազմակերպության արտգործնախարարների խորհրդի 43- րդ նիստի շրջանակներում Ուզբեկստանի մայրաքաղաքում հավաքված պաշտոնյաները դատապարտել են նաեւ իսլամական պատմության եւ մշակույթի քարե վկաներիՙ հուշարձանների ավերը հայկական զինուժի վերահսկման տակ գտնվող Ադրբեջանի տարածքներում:
Տաշքենդում ընդունված բանաձեւը հորդորում է ՄԱԿ- ի ԱԽ- ին Հայաստանին որպես ագրեսոր ճանաչել, անդամ պետություններին խնդրում հնարավորություն չտալ, որ Հայաստանն իր տարածքը որպես տրանզիտ գործածի զենք եւ ռազմամթերք փոխադրելու համար, ծանուցում է ադրբեջանական պետական լրատվական գործակալությունը:
Փաստաթուղթը, որ սուր քննադատում է Հայաստանիՙ Ադրբեջանի իսլամական հուշարձանները ոչնչացնելու քաղաքականությունը, պահանջում է, որ զբոսաշրջային միջազգային տոնավաճառներում, տարբեր միջոցառումների ժամանակ ՀՀ դադարեցնի Ադրբեջանի պատմական եւ մշակութային ժառանգությունը որպես իրենը ներկայացնելու քաղաքականությունը:
Անահիտ ՀՈՎՍԵՓՅԱՆ
Կարդացեք նաև
Հոդվածն ամբողջությամբ՝ «Ազգ» շաբաթաթերթի այս համարում
