Այսօր ՀՅԴ խմբակցության քարտուղար Աղվան Վարդանյանն ԱԺ-ում ներկայացրեց իրենց խմբակցության տեսակետը՝ կառավարության ծրագրի մասին:
Նա ասաց, որ այս ծրագիրն ունենալու է ՀՅԴ-ի աջակցությունը. «Սա այն է, ինչ տարիներ շարունակ մենք ասել ու պահանջել ենք, բայց ուժներս չի պատել պարտադրել»:
Աղվան Վարդանյանն ընդգծեց, որ այս ծրագիրը դեռ պետք է իրականացնել նախընտրական խառը թոհուբոհի շրջանում, երբ շատերն ամբոխավարությունից, քաղաքական աճպարարությունից չեն հրաժարվելու, երբ համատարած անվստահության մթնոլորտ է»:
Կարդացեք նաև
ՀԱԿ խմբակցության ղեկավար Լեւոն Զուրաբյանն էլ իր ելույթում ասաց, որ Կարեն Կարապետյանը նշանակվել է Սահմանադրության խախտումով: Ըստ նրա, դեռեւս պահպանվում է այն կարգը, որ նախագահը վարչապետ նշանակելուց առաջ պետք է խորհրդակցի խմբակցությունների հետ, մինչդեռ Սերժ Սարգսյանը ՀԱԿ-ի հետ այդ հարցով չի խորհրդակցել:
Նա ասաց, որ չնայած 2013, 2014-ին ՀԱԿ-ը ինքն է մերժել նման խորհրդակցության անցկացումը, բայց դա չի կարող արդարացնել, որ սահմանադրական պարտավորությունները հավուր պատշաճի չկատարեն:
Անդրադառնալով կառավարության ծրագրին՝ Լեւոն Զուրաբյանն ասաց, որ այս վարչապետը մի շատ լավ բան արդեն արել է՝ կառավարությունից հեռացրել է մարզպետի, մարդկանց, որոնց կուտակված հարստությունների, չարաշահումների մասին չի գրել միայն ծույլը:
Նա ասաց, որ սա դրական քայլ է, հույսեր է արթնացնում, որ ինչ-որ բան կարող է փոխվել դեպի լավը: Լեւոն Զուրաբյանը դժգոհեց, որ մինչ կառավարության ծրագիրը ներկայացնելը՝ Կարեն Կարապետյանը պետք է ախտորոշիչ գնահատականը տար ՀՀ տնտեսության, ինչը չի արել:
Ըստ պարոն Զուրաբյանի, Կարեն Կարապետյանը պետք է գործող տնտեսության արատները ներկայացներ,նաեւ՝ տեսլականը. «Ծրագիրը ընդամենը ներկայացնում է այն գործիքները, որը կառավարությունը կկիրառի»:
Լեւոն Զուրաբյանի գնահատմամբ՝ սա ծրագիր է ընտրողների առաջ որեւէ քաղաքական պատասխանատվություն չստանձնելու մասին, թվեր չկան: Նա համոզմունք հայտնեց, որ սա ընդամենը ընտրություններից առաջ ժողովրդի վստահությունը շահելու համար է արվում եւ Կարեն Կարապետյանը եկել է ՀՀԿ-ի դեմքը փրկելու. «Համարյա չկան դրույթներ, թե կառավարության գործունեության արդյունքում երբ եւ ինչ արդյունքների ենք հասնելու՝ բացառությամբ այնպիսի 1-2 օրինակների, ինչպիսին է 5 տարվա ընթացքում զբոսաշրջիկների թվի եռապատկումը»:
Լեւոն Զուրաբյանն ասաց, որ սա 6 ամսվա ծրագիր է, բայց կառավարության ծրագիրը պետք է լինի երկարատեւ ռազմավարություն: ԱԺ փոխխոսնակ Էդուարդ Շարմազանովն էլ արձագանքեց. «Կամ չէր կարդացել կառավարության ծրագիրը, կամ իրեն սուտ էին պատմել, որովհետեւ կառավարության ծրագիրը երկու փուլից է՝ 6-ամսյա եւ երկարատեւ փուլ ունի»:
Հռիփսիմե ՋԵԲԵՋՅԱՆ
