«Իրատեսի» հյուրն է քաղաքական վերլուծաբան Վիգեն Հակոբյանը
– Եթե Կարեն Կարապետյանը պաշտոնավարելու է մինչև 2018, անխուսափելի չի՞ դառնում քաղաքականություն մտնելը։ Խորհրդարանական ընտրություններից մինչև 2018-ը դառնում է ամենաբարդ շրջանը՝ նայած Սերժ Սարգսյանը ի՞նչ է որոշել, նա կարող է վարչապետին օգնել կամ խանգարել։ Այդպես չէ՞։
– Կարծում եմ՝ այդ հարցի պատասխանը ոչ ոք չունի, նաև Սերժ Սարգսյանը։ Նա փուլ առ փուլ է որոշելու իր անելիքը։ Առաջին փուլի արդյունքները կախված կլինեն խորհրդարանական ընտրություններից և կառավարության արդյունքներից։ Եթե կառավարությունը հաջողության հասնի, գործող նախագահին ձեռնտու է վարչապետի հետ տանդեմը, 2018-ից հետո կախված այս ժամանակվա արդյունքներից ու աշխարհաքաղաքական զարգացումներից՝ կկայացվի հաջորդ որոշումը։
– Հնարավո՞ր է, որ Մոսկվան խաղը դնի Կարեն Կարապետյանի վրա։
Կարդացեք նաև
– Հնարավոր է, բայց հնարավոր է, որ այդ որոշումը կայացվի երկրի ներսում՝ ազդեցիկ խմբավորումների միջև։
– Նոյեմբերի 26-ին ՀՀԿ համագումարն է և արդեն հայտարարվել է, որ Կարեն Կարապետյանը նոր ոգի պիտի բերի ՀՀԿ-ին, ի՞նչ է դա նշանակում գործնականում։
– Ես կարծում եմ՝ եթե կառավարությունը հասարակության մեջ որոշակի սպասումներ է առաջացնում ու որոշակի իմիջ ունի, բավականին լուրջ դիսոնանս կա իշխող կուսակցության, որ համարվում է կառավարության քաղաքական պատասխանատուն, ու կառավարության միջև։ Այսօրվա ՀՀԿ-ից հասարակությունն այլևս որևէ սպասում չունի, դա հաստատեցին նաև ՏԻՄ ընտրությունները, ՀՀԿ-ն նույնիսկ խուսափում էր ընտրություններում իր անունով հանդես գալ՝ ինչպես Գյումրիում էր, որտեղ «Բալասանյան» դաշինք ստեղծվեց։ Իշխանության գլխավոր խնդիրներից մեկը այդ դիսոնանսը հարթելն է՝ ՀՀԿ-ում էլ պիտի կադրային կտրուկ փոփոխություններ լինեն։ Կառավարության ու ՀՀԿ-ի ռազմավարությունը նույնը պետք է լինի։ ՀՀԿ մամլո խոսնակը պարբերաբար ասում է, որ չեն բացառվում հետաքրքիր, լուրջ փոփոխությունները ՀՀԿ ղեկավար կազմում։ Կապրենք՝ կտեսնենք։
Անահիտ ԱԴԱՄՅԱՆ
Հոդվածն ամբողջությամբ կարող եք կարդալ «Իրատես» թերթի այսօրվա համարում
