Կենտրոնական ընտրական հանձնաժողովն այսօր արտահերթ նիստում քննեց ընտրատեղամասային ընտրական հանձնաժողովների որոշումների վերաբերյալ ստացված բողոք դիմումները:
ԿԸՀ նախագահ Տիգրան Մուկուչյանի խոսքով, ՏԻՄ ընտրություններից հետո բազմաթիվ Ընտրատեղամասային ընտրական հանձնաժողովների որոշումների վերաբերյալ ներկայացվել են տարբեր բողոք-դիմումներ:
Կենտրոնական ընտրական հանձնաժողովն առաջինը քննեց ու մերժեց «Համախմբում» կուսակցության ներկայացուցիչ Անդրանիկ Թեւանյանի բողոք դիմումը: Վերջինս Գյումրիի ՏԻՄ ընտրությունների ժամանակ թիվ 34 Ընտրատարածքային ընտրական հանձնաժողովում վստահված անձ է եղել: Ըստ նրա, Գյումրում քվեարկությունը կայացվել է օրենքի խախտմամբ: Բողոքաբերը գտնում էր, որ այդ հանձնաժողովում վերաքվեարկություն պետք է լինի: Ըստ նրա, անվավեր են ճանաչվել քվեաթերթիկներ, ինչով խախտվել է քաղաքացու ազատ ընտրելու իրավունքը:
ԿԸՀ-ն միաձայն որոշեց մերժել Թեւանյանի բողոքը՝ հիմնավորելով, թե անվավեր ճանաչված քվեաթերթիկներով ընտրությունների արդյունքների էական փոփոխություն չէր կարող լինել:
Կարդացեք նաև
«Չենք ասում՝ 99 անվավեր թերթիկները կարող էին ընտրությունների արդյունքի վրա ազդել, այլ ասում ենք՝ քվեաթերթիկները ոչ ընտրողի մեղքով անվավեր ճանաչելով՝ խախտվել կամ սահմանափակվել է ընտրողի ընտրական իրավունքը»,- բացատրեց Անդրանիկ Թեւանյանը;
Արփինե ՍԻՄՈՆՅԱՆ
