«Լավրովի հայտարարությունը կապված է Թուրքիայի արտգործնախարարի՝ օրերս Եվրոպայի խորհրդում արված հայտարարության հետ: Նա խոսեց ՌԴ-ի հետ պայմանավորվածության մասին՝ համատեղ ջանքերով ձեռնամուխ լինել ԼՂ հակամարտության կարգավորմանը: Ռուսական կողմը դա չհերքեց: Տեսնում ենք հաստատում»,- այսօր «Մեդիա կենտրոնում» անդրադառնալով ՌԴ արտգործնախարար Սերգեյ Լավրովի՝ վերջերս Երեւանում արված հայտարարությանը, թե «Թուրքիան կարող է դրական դեր խաղալ Արցախյան հակամարտության կարգավորման հարցում», նշեց ՀԱԿ-ի արտաքին կապերի պատասխանատու Վլադիմիր Կարապետյանը:
Նա խոսեց նաեւ Ադրբեջանի նախագահի՝ օրերս տված հարցազրույցի մասին եւ ասաց՝ իրեն մտահոգել է Ալիեւի այն հայտարարությունը, թե Ադրբեջանը կարող է անդամակցվել ԵՏՄ-ին: «Ի՞նչն է փոխվել, որ Ադրբեջանը ներգրավվել է բանակցություններում: Ակնհայտ է, թե դրա դիմաց Ադրբեջանն ինչ գին է պահանջելու: Եթե Ալիեւն այդ մասին բարձրաձայնում է, պետք է շատ մտահոգվենք՝ ի՞նչն է սեղանին դրված որպես փոխհատուցում»,-ասաց Կարապետյանը:
Դառնալով Արցախյան հակամարտությանը՝ նա կարծիք հայտնեց, որ հակամարտության գոտում լարվածությունը գուցե ավելանա, եւ դրա պատճառը հակամարտության կարգավորման հեռանկարների բացակայությունն է. «Պետք է պատրաստ լինենք լարվածության աճին եւ Ադրբեջանի կողմից դիվերսիան հետ մղելուն»:
Լուիզա ՍՈՒՔԻԱՍՅԱՆ
Կարդացեք նաև
Լուսանկարը՝ «Մեդիա կենտրոնի»
