«Ալիեւն ուղղակի որոշեց ճիշտ խոսել: Հատկապես Ռուսաստանի եւ արեւմտյան ցանկացած երկրի համար պարզ է, որ նախորդ դարի 20-ական թթ. կոպիտ խախտվել է հայ ազգի իրավունքը: Կորցրեցինք Նախիջեւանն ու Արցախը, որովհետեւ այդպես ցանկանում էր Քեմալական Թուրքիան: Այս ամենն ի հայտ է գալիս, գերտերություններն էլ կխոսեն այն մասին, որ ժամանակն է անցնել իրականությանը: Միայն այդ դեպքում կլուծվի հակամարտությունը»,-Aravot.am-ի հետ զրույցում անդրադառնալով Ալիեւի՝ վերջերս հնչեցրած հայտարարությանը, թե իր վրա ճնշում են գործադրում եւ ստիպում ճանաչել Արցախի անկախությունը, ասաց ԱԱԾ պետի նախկին տեղակալ Գուրգեն Եղիազարյանը:
Նա նշեց, որ ողջունում է Ալիեւի հայտարարությունը եւ նկատում, որ Ադրբեջանի նախագահի միտքն ավարտվել է հետեւյալ շեշտադրմամբ՝ «իմ նախագահության օրոք դա չի լինելու»: Գուրգեն Եղիազարյանն ընդգծեց, որ ըստ Ալիեւի՝ «եթե այլ իշխանություն լինի, չգիտի՝ հարցն ինչպե՞ս կլուծվի»:
«Երբ մի բան ցանկանում են կատարել, սկզբից լուրն են «բաց թողնում»…չեմ կարծում, որ Ադրբեջանն անմիջապես կհամաձայնի, եւ Արցախը «կստանա» անկախություն, բայց, փառք Աստծո, առաջին փոքրիկ քայլն արված է»,-համոզված է մեր զրուցակիցը:
Լուիզա ՍՈՒՔԻԱՍՅԱՆ
